«Татар кызы, Татар егете – 2025» бәйгесенең җиңүчеләре кем булыр?

8 декабрьдә Ленин мәдәният сараенда узачак йомгаклау чарасында район турларында җиңү яулаган 8 кыз һәм 8 егет «Татар кызы» һәм «Татар егете» исеме өчен  көч сынашачак. Бу хакта Казан шәһәре Башкарма комитеты Аппаратының Тел культурасы өлкәсендә милли сәясәтне гамәлгә ашыру бүлеге хәбәр итә.

Финалистлар арасында:
- Совет районыннан  171нче мәктәп укучысы Зарифуллина Зәмирә, 125нче гимназия укучысы Шакирова Илизә, А.Алиш ис. 20нче гимназия укучысы Сираҗиев Рөстәм, 141нче гимназия укучысы Кыямов Ризван;
- Авиатөзелеш районыннан 37нче гимназия укучысы Заһирова Диләрә, 33нче гимназия укучысы Садыйков Камил;
- Мәскәү районыннан – Л.Н.Мурысин ис. 94нче гимназия укучысы Нургалиева Әдилә, Ш.Мәрҗани ис. 2нче татар гимназиясе укучысы Нәҗмиев Рифнур;
- Киров районыннан 152 нче гимназия укучысы Гайнулин Тимерлан,  15нче татар гимназия укучысы Низамова Камилә;
- Яңа Савин районыннан 155нче гимназия укучысы Сабиров Ислам,  «Адымнар» полилингваль комплексы укучысы Хәсәнова Таңсылу;  
- Вахитов районыннан  Советлар Союзы Герое А.С. Умеркин ис.116нчы лицей укучылары Әхмәтҗанова Әминә, Нигъмәтуллин Динияр;
- Идел буе районыннан 83нче лицей-мәгариф үзәге укучысы Сабирова Мәрьям, «Галәм»  18нче гимназия укучысы Галиев Кәрим.

Финал өчен егетләр, кызлар махсус визит карточкасы, танылган шәхес белән берлектә иҗади номер әзерли. Өченче бирем шарты буенча халык язучысы Т.Миңнуллин иҗатына багышланган чыгыш күрсәтелергә тиеш. Катнашучыларның осталыгын традиция буенча мәртәбәле жюри бәяләячәк. Иң югары балл җыйган конкурсантлар җиңүче – «Татар кызы» һәм «Татар егете» булачак. Барлык катнашучылар да дипломнар һәм кыйммәтле бүләкләр белән бүләкләнәчәк. 

Белешмә өчен. 
«Татар кызы» бәйгесе Казан шәһәре Башкарма комитетының Мәгариф идарәсе тарафыннан 1999 елдан бирле үткәрелә, «Татар егете» – 2006 елдан, ә 2014 елдан башлап «Татар кызы, Татар егете» бердәм бәйге буларак, шәһәр халкы өчен зур бәйрәм итеп үткәрелә башлады.