Татарча көрәш һәм кул көрәше буенча Россиякүләм турнирда төп бүләк – Хаҗга юллама уйнатылачак

Ярышлар Татарстан мөфтияте тарафыннан игълан ителгән Каһарманнар елы һәм һиҗри ел исәбе буенча 1447 елда билгеләп үтелүче Пәйгамбәребезнең ﷺ 1500 еллыгы кысаларында үтәчәк.

Турнирның төп бүләге – 2026 ел хаҗына юллама. Аны үз категориясендә җиңү яулаучылар (алар барысы 10 кеше) арасында уйнатачаклар.

Әлеге чараның төп оештыручылары – Татарстан мөфтияте, Чаллы шәһәре Башкарма комитеты, Россиянең һәм Татарстанның Татарча көрәш Федерацияләре һәм Чаллы шәһәре мөхтәсибәте. Турнирда Татарстаннан һәм күрше төбәкләрдән 100гә якын спортчы катнашыр дип көтелә.

Ел саен үткәрелә торган турнир мөселман яшьләре арасында татар милли көрәшенең һәм кул көрәшенең дәрәҗәсен күтәрергә, актив һәм сәламәт яшәү рәвешен популярлаштырырга мөмкинлек бирә. Моннан тыш, ярышлар яшьләрдә рухи ныклык һәм чыдамлык тәрбияләүгә, спортчылар арасында дуслык һәм туганлык мөнәсәбәтләрен ныгытуга юнәлдерелгән.

Татар милли көрәшендә 18 яше тулган, физик әзерлеге яхшы булган һәм намазны дөрес уку буенча тестны уңышлы тапшырган мөселманнар катнаша ала. Ярышлар милли көрәштә – 65кә кадәр, 75кә кадәр, 85кә кадәр, 95кә кадәр, 105кә кадәр килограмм һәм аннан да авыррак үлчәү категорияләрендә, кул көрәшендә – 70кә, 85кә һәм 85 килограммнан авыррак үлчәү категорияләрендә узачак. Кул көрәшендә 60 яшь һәм аннан өлкәнрәк спортчылар (ветераннар) өчен яңа категория өстәлде. Һәр авырлык категориясе буенча җиңү яулаучылар дипломнар һәм кыйммәтле призлар белән бүләкләнәчәк. Ә җиңүче команда Татарстан мөселманнары Диния нәзарәте Кубогына ия булачак.

Турнирның тантаналы ачылышы – сәг. 10.00-дә, ә катнашучыларны үлчәү һәм намаз тәртипләре буенча сынау сәг. 8.00-дән башланачак.

Ярышларга нигезләмә

ТР Диния нәзарәте матбугат хезмәте