Татарстан мөселманнары махсус хәрби операция зонасына Нива автомобиле һәм мотоцикллар озатты

Татарстан Диния нәзарәте хәбәр иткәнчә, гуманитар йөк Нәзарәт казые, Ютазы районы имам-мөхтәсибе Марат хәзрәт Мәрданшин башлангычы белән җыелган. Аны махсус хәрби операция зонасыннан кыска вакытлы ялга кайткан МТО ВДВның 91нче аерым бригадасы хәрбие Гали Сибагатов кабул итеп алган.

Бу юлы алгы сызыктагы хәрбиләргә:

* Нива автомобиле;

* штурм бүлекчәләре өчен ике мотоцикл (берсе бишекле, икенчесе ике тәгәрмәчле);

* авыртуны баса торган дарулар;

* өйдә әзерләнгән кайнатмалар һәм тозланган ризыклар;

* хөрмә һәм озак саклана торган азык-төлек җибәрелгән.

Гуманитар ярдәм әзерләүдә Ярдәм-Помощь хәйрия фонды, Казан мөселманнары, шулай ук Бөгелмә районы Кодаш авылы мәчете үз өлешен керткән.

Йөкне юлга озату тантанасында Татарстан мөфтиенең мөхтәсибәтләр белән эшләү буенча урынбасары, Мәрҗани мәчете имам-хатыйбы Равил хәзрәт Зөфәров катнашкан.