Татарстан укучыларына кагыла: 2026 елдан мәктәп олимпиадаларын үткәрү тәртибе үзгәрә

Бу хакта Парламентская газета Россия Мәгариф һәм фән министрлыгы мәгълүматларына сылтама белән хәбәр итә.

Үзгәрешләр олимпиадаларның финал этабы форматына, җиңүчеләрне билгеләү тәртибенә, жюри һәм комиссия әгъзаларына куелган таләпләргә, шулай ук олимпиадаларга дәрәҗә бирү кагыйдәләренә кагылачак.

Яңа тәртип буенча:

* йомгаклау этабы бары тик көндезге форматта уздырылачак;
* нәтиҗәләр шәхси зачет нигезендә чыгарылачак;
* оештыру комитеты, жюри, методик һәм апелляция комиссиясе әгъзаларына төгәл таләпләр беркетеләчәк;
* олимпиадаларга дәрәҗә бирү өчен критерийлар катгыйланачак.

Моннан тыш, 2026–2027 уку елыннан катнашучылар саны кимендә 300дән 500гә кадәр арттырылырга тиеш. Олимпиадага вәкил җибәрүче төбәкләр саны да 10нан 25кә кадәр үсәргә тиеш булачак. Финал этабындагы биремнәрнең яртысы иҗади, оригиналь һәм югары катлаулылык дәрәҗәсендә булырга тиеш.

Әлеге яңалыклар Россия мәктәп укучылары олимпиадалары советы (РСОШ) карамагындагы олимпиадаларга гына кагыла. Алар Бөтенроссия мәктәп укучылары олимпиадасына кагылмый.

Министрлык аңлатуынча, үзгәрешләрнең төп максаты — ярышларның сыйфатын күтәрү, профильләр санын системалаштыру һәм финалистларга бирелә торган дипломнар санын киметү.

Шулай ук яңалыклар буенча мәктәп укучылары белән беррәттән урта һөнәри белем бирү учреждениеләрендә укучылар да рәсми рәвештә олимпиадаларда катнаша алачак. Бу хакта Федерация Советының фән, мәгариф һәм мәдәният комитеты рәисе урынбасары Людмила Скаковская белдергән.

Белгечләр фикеренчә, яңа кагыйдәләр талантлы яшьләр өчен тигез мөмкинлекләр тудыруга юнәлдерелгән.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.