Татарстанда азык-төлек бәяләре арткан: йомырка бер атнада алты сумга кыйммәтләнгән

Узган атнада иң зур үсеш тавык йомыркасына туры килгән.

Бер атна эчендә йомырканың бәясе 75,82 сумнан 81,40 сумга кадәр күтәрелгән. Шулай ук шикәр комы (килограммы 60,68 сумнан 62,44 сумга кадәр) һәм кишер (37,07 сумнан 40,46 сумга кадәр) сизелерлек кыйммәтләнгән.

Ит продукциясендә дә үзгәрешләр бар. Сыер ите бәясе килограммы өчен 670,90 сумга, сарык ите 886,43 сумга кадәр арткан. Шул ук вакытта дуңгыз ите (342,30 сумга кадәр) һәм тавык ите (килограммы 206,58 сумга кадәр) бераз арзанайган.

Сөт ризыкларыннан ак май бәясе аз гына кимегән һәм 1 010,54 сум тәшкил итә. Ә менә эремчек 463,39 сумга, кефир 102,45 сумга кадәр күтәрелгән.

Яшелчә базарында да җанлану сизелә: бәрәңге – 41,28 сумга, кәбестә – 34,54 сумга, суган 42,62 сумга кадәр кыйммәтләнгән. Шул ук вакытта кыярлар (268,50 сум) һәм помидорлар (235,10 сум) арзангарак сатылган.

Җиләк-җимеш арасында бананнарның бәясе килограммы өчен 154,15 сумга, алмалар 134,30 сумга кадәр күтәрелгән.

Белгечләр билгеләп үткәнчә, язга таба сезонлы факторлар аркасында яшелчә һәм җиләк-җимешкә бәяләр үзгәрүчән була. Киләсе атналарда динамика сакланырмы – монысы әлегә сорау булып кала.