Татарстанда дропперлар саны 1,5 тапкырга кимегән

Бу хакта матбугат конференциясендә ТР буенча Эчке эшләр министрлыгының киберҗинаятьчелеккә каршы көрәш идарәсе башлыгы Руслан Гомәров хәбәр итте.

Шикле түләүләргә җәлеп ителгән затлар саны 73 меңнән 45 меңгә кадәр кимегән. Балигъ булмаган дропперлар саны 10 меңнән 4 меңгә калган. Алар катнашындагы шикле операцияләр күләме 73% ка диярлек азайган — 1,7 млрд сумнан 450 млн сумга кадәр.

Гомумән алганда, физик затларның шикле операцияләре күләме буенча Татарстан Россиядә 3 нче урында, ә халык санына карата исәпләгәндә — 9 нчы урында тора.

— Тулаем ил буенча шикле финанс агымнары кими, әмма Татарстанда бу процесс аеруча динамик бара, — дип билгеләде Руслан Гомәров.

Шул ук вакытта республикада IT-җинаятьләр өлкәсендә китерелгән зыян 2025 ел нәтиҗәләре буенча 6 млрд сум тәшкил иткән. Әмма уңай тенденция дә бар: биш ел эчендә беренче тапкыр IT-җинаятьләр саны кимегән. 2024 елда алар 32 мең булса, 2025 елда — 25 меңгә якын.

Белгечләр фикеренчә, профилактика чаралары һәм аңлату эшләре нәтиҗә бирә башлаган.