Татарстанда «Гаилә атнасы» башлана: 700дән артык чара һәм 65 төрле ярдәм программасы гамәлдә

Бу хакта «Татар-информ» агентлыгында узган матбугат конференциясендә ТР Министрлар Кабинетының ЗАГС идарәсе башлыгы Эльвира Әхмәтова хәбәр итте.

Республикада киң колачлы программа кысаларында 700дән артык төрле чара үткәрү планлаштырыла.

«Татарстан – бәхетле гаиләләр территориясе»

«Гаилә атнасы» быел «Татарстан – бәхетле гаиләләр территориясе» шигаре астында уза. Аның төп максаты — гаилә кыйммәтләрен ныгыту, традицияләрне саклау һәм үстерү, шулай ук гаилә аша патриотик тәрбия бирү.

Эльвира Әхмәтова билгеләп үткәнчә, республикада гаиләләргә ярдәм итү буенча системалы эш алып барыла.

65 төрле социаль ярдәм чарасы

Бүген Татарстанда гаиләләр өчен 65 төрле социаль ярдәм чарасы гамәлдә, шуларның 60ы республика бюджетыннан финанслана.

«Күп балалы гаиләләр саны елдан-ел арта. Бүген республикада 59 меңнән артык күп балалы гаилә яши, аларда 189 мең бала тәрбияләнә», — дип белдерде ул.

Моннан тыш, Татарстанда яшь гаиләләр өчен дәүләт торак программалары гамәлгә ашырыла, шулай ук балалы студент гаиләләренә ярдәм итү чаралары киңәйтелә.

Илкүләм проект кысаларында ярдәм

Искәртеп узабыз, Россиядә балалы гаиләләргә ярдәм «Гаилә» илкүләм проекты нигезендә гамәлгә ашырыла.