Татарстанда грипп чигенә, авырулар саны кими

Татарстанда ОРВИ һәм грипп белән сезонлы авыру дәрәҗәсе саклана. Шул ук вакытта лаборатор расланган грипп очраклары саны кимеде. Бу хакта Роспотребнадзорның ТР буенча идарәсе матбугат хезмәте хәбәр итә.

Бер атна эчендә республикада ОРВИ һәм гриппның 12 760 очрагы теркәлгән. Авыру эпидемик бусагадан 35,6% ка түбәнрәк. Гриппка уңай нәтиҗәләр өлеше 65,8 % ка кадәр кимегән һәм 374 очрак тәшкил иткән. А гриппы вирусы өстенлек итә, шулай ук В гриппы аерылып чыга башлады.