Татарстанда яшь гаиләләргә процентсыз торак кредиты бирергә мөмкиннәр

Ул ислам ипотекасы һәм процентсыз кредитлау принципларына нигезләнергә мөмкин. Бу хакта Тасс агентлыгы хәбәр итә. 

Азат Кадыйров бу яңалыкны Россия — Ислам дөньясы: Казанфорум мәйданчыгында игьлан иткән. 

Министр сүзләренчә, республикада яшь гаиләләрне торак белән тәэмин итү программасы инде 20 елдан артык эшли. Шушы вакыт эчендә 8 меңнән артык гаилә ярдәм алган, әмма тагын 3 меңгә якын гаилә әле дә торак мәсьәләсенә мохтаҗ булып кала.

«Без бу программага яңа тормыш бирергә телибез. Хәзер тәкъдимнәр әзерлибез, концепцияне яңача формалаштырабыз», — дип белдерде Азат Кадыйров.

Аның әйтүенчә, программаның нигезендә элек тә ислам ипотекасы элементлары һәм процентсыз кредитлау механизмнары булган. Хәзер исә әлеге юнәлешне тулысынча яңартып, заманча форматта тәкъдим итәргә җыеналар.

Министр шулай ук Татарстанда бүген яшьләргә һәм яшь гаиләләргә ярдәм итүче дүрт төрле программа эшләвен искәртте.

Яңа проект кабул ителгән очракта, ул яшь гаиләләр өчен фатир алу мөмкинлеген сизелерлек җиңеләйтергә мөмкин.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.