Татарстанда карның кайчан эреп бетәчәген әйттеләр

Әмма төгәл даталар язгы процесслар үсешенә бәйле. Бу хакта «Татар-информ» агентлыгына ТР Гидрометеорология үзәге башлыгы Феликс Гоголь хәбәр иткән.

Феликс Гоголь сүзләренә караганда, республикада кар катламының иң иртә эрү датасы мартның өченче декадасына туры килә, ә иң соңгысы апрель азагы — майда теркәлгән.

Татарстан Гидрометүзәге мәгълүматлары буенча, хәзер Татарстанда кар катламының биеклеге 39–67 сантиметр аралыгында. Иң күп кар Яшел Үзән һәм Арча районнарында, шулай ук Казанда теркәлгән. Күпчелек муниципалитетларда кар күләме күпьеллык уртача күрсәткечләрдән бер ярым-ике тапкыр һәм аннан да күбрәккә югарырак.

Экспертлар белдергәнчә, бу күренеш язгы су басулар куркынычын арттырырга мөмкин, шуңа күрә муниципалитетлар һәм халыкка сак булырга киңәш ителә.

Билгеле булганча, «Экологик иминлек» илкүләм проекты гамәлгә ашырыла.