Татарстанда матур дата «туй шаукымы» тудырган: бер көндә 600 гә якын пар гаилә корган

Матур дата уңаеннан республика ЗАГСларында 600 гә якын никах теркәлде.

Тантаналар Татарстанның 45 мәйданчыгында узды: традицион никахлашу сарайларыннан алып үзенчәлекле күчмә урыннарга кадәр. Иң күп пар Казанда гаилә корды — биредә 114 никах теркәлде. Чаллыда — 74, Арчада — 23, Тукай районында — 22, Түбән Камада — 21, Әлмәттә — 16 парның никахы рәсмиләштерелде.

ЗАГС идарәсе мәгълүматларына караганда, матур даталар киләчәктә дә яшь парлар арасында популяр булыр дип көтелә. 2026 елда аеруча көтелгән көннәр арасында 26 сентябрь һәм 26 декабрь даталары бар.

Татарстанда июль һәм август айлары туйлар өчен иң популяр чор булып кала. Шулай ук яшь гаиләләр дәүләт бәйрәмнәрендә — Россия көне, Татарстан Республикасы көне һәм Халыклар бердәмлеге көнендә никахларын теркәүне еш сайлый башлаган.