Татарстанда өч елда М-7 һәм М-12 трассалары буйлап 200гә якын база станциясе урнаштырылган

Бу хакта ТР Цифрлы үсеш министрлыгы хәбәр итә.

2025 елда төп транспорт юнәлешләрендә элемтә сыйфатын яхшыртуга аерым игътибар бирелгән. Аерым алганда, М-7 трассасы буйлап 14 яңа база станциясе урнаштырылган, ә М-12 юлында тагын 40 объект файдалануга тапшырылган. Бу чаралар юлларның озын участокларында мобиль элемтә һәм интернет өслеген киңәйтергә, тотрыксыз элемтә зоналары санын киметергә мөмкинлек бирә.

ТР цифрлы үсеш министры урынбасары Альберт Яковлев билгеләп үткәнчә, мобиль элемтә һәм интернетка тотрыклы керү төбәкнең цифрлы үсешенең мөһим күрсәткече булып тора.

«Без инфраструктураны халык яшәгән яки хәрәкәт иткән урынга карамастан, мобиль сервислардан һәм элемтәдән иркен файдалана алсын өчен эзлекле рәвештә үстерәбез. Соңгы өч елда М-7 һәм М-12 трассалары буйлап 200гә якын база станциясе урнаштырылды. Андагы элемтә навигация һәм интернет өчен генә түгел, ашыгыч хәлләрдә дә аеруча әһәмиятле», – диде ул.

2025 елда әлеге трассалардан ГЛОНАСС-112 системасына 910 мөрәҗәгать кергән, аларның күпчелеге юл-транспорт һәлакәтләре белән бәйле булган. Бу саннар юллар буйлап тотрыклы элемтәнең никадәр мөһим булуын ачык күрсәтә.

Искәртеп үтик, «Мәгълүматлар икътисады һәм дәүләтнең цифрлы трансформациясе» милли проекты кысаларында Россиядә 2030 елга кадәр 75 мең база станциясе әзерләү һәм урнаштыру планлаштырыла.