Татарстанга эсселек һөҗүм итә: табиблар һәм коткаручылар хәвефле билгеләр турында кисәтә

Синоптиклар фаразлавынча, республикада һава температурасы +26дан +32 градуска кадәр күтәреләчәк.

Россия Гадәттән тыш хәлләр министрлыгының Татарстан Республикасы буенча Баш идарәсе белгечләре мондый һава шартларында җылылык сугуы һәм организмның артык кызуы куркынычы артуын искәртә. Бу исә йөрәк-кан тамырлары системасы эшчәнлегенә тискәре йогынты ясарга мөмкин.

Коткаручылар киңәш иткәнчә, эссе көннәрдә мөмкин кадәр кояш астында озак йөрмәскә, бүлмәләрне салкынча тотарга, җиңел һәм ачык төстәге кием кияргә кирәк. Шулай ук күп итеп су эчү мөһим.

Белгечләр көчле физик эштән вакытлыча баш тартырга, балаларны һәм йорт хайваннарын ябулы автомобильләрдә калдырмаска чакыра. Моннан тыш, коры һәм эссе һава шартларында ут белән саксыз эш итү янгын чыгуга китерергә мөмкин булуын да искәртәләр.

Аеруча өлкән яшьтәге һәм хроник авырулары булган кешеләргә игътибарлы булырга кирәк. Кирәк булганда аларга ярдәм күрсәтү сорала.

Гадәттән тыш хәл килеп чыккан очракта 112 номеры буенча шалтыратырга мөмкин.