Татарстанны эсселек били: бүген һава температурасы +33 градуска кадәр җитәчәк

Синоптиклар фаразлавынча, республикада алмашынучан болытлы һава көтелә, әмма явым-төшем булмаячак.

Җил төньяк-көнчыгыштан исәчәк, тизлеге секундына 4–9 метр тәшкил итә. Көндез кайбер районнарда җилнең көчәюе дә ихтимал — урыны белән 13 м/с ка кадәр җитәчәк.

Төнлә республикада һава температурасы +9...+14 градус чикләрендә сакланды, ә көнбатыш районнарда +18 градуска кадәр күтәрелде. Көндез исә һава +28...+33 градуска кадәр җылыначак.

Казанда да коры һәм җылы һава торышы көтелә. Башкалада көндез термометр баганалары +30...+32 градус күрсәтәчәк. Җилнең тизлеге 4–9 м/с булачак, урыны белән көчәйгән вакытлары да мөмкин.

Синоптиклар мондый эссе көннәрдә күбрәк су эчәргә, озак вакыт кояш астында йөрмәскә һәм бигрәк тә көндезге сәгатьләрдә сак булырга киңәш итә.