Татарстанның бер төбәгендә электросамокатлар тыелган

Шәһәр башкарма комитетында аңлатуларынча, җирле инфраструктура әлегә мондый транспорт өчен җайлаштырылмаган – шәһәрдә велоюллар, полосалар һәм кирәкле юл билгеләре юк.

Хәрәкәт куркынычсызлыгы буенча комиссия Алабуга районы территориясендә самокатлар прокатын тулысынча тыю турында карар кабул иткән. Администрациядә билгеләп үтүләренчә, урамнарда һәм тротуарларда аларның саны арту җәяүлеләр өчен дә, машина йөртүчеләр өчен дә куркыныч хәлләр тудыра башлаган. Шул ук вакытта прокат хезмәте күрсәтүче компанияләр кирәкле куркынычсызлык дәрәҗәсен тәэмин итә алмыйлар.

Тыюга карамастан, эшмәкәрләрнең берсе аны игътибарсыз калдырган һәм самокатларны арендага бирүне дәвам иткән. Берничә җайланманы рөхсәт ителгән зонадан тыш тапканнар - аларны штрафстоянкага алып киткәннәр. Соңрак электросамокатларны арендага бирү оешмасы хуҗасы шәһәр хакимияте белән элемтәгә кергән, һәм вәзгыять җайга салынган.

Башкарма комитетта ассызыклаганча, прокат нокталарын килештермичә урнаштырган кешеләргә карата катгый чаралар кулланылачак.