Татарстанның Вәкаләтле вәкиле адресына медицина ярдәме күрсәтү мәсьәләләре буенча 203 мөрәҗәгать кергән

Җиденче чакырылыш Татарстан Дәүләт Советының унсигезенче утырышында Татарстанда Кеше хокуклары буенча вәкаләтле вәкил Сәрия Сабурская белдергәнчә, хисап елында Вәкаләтле вәкил адресына медицина ярдәме күрсәтү мәсьәләләре буенча гражданнардан 203 мөрәҗәгать кергән. “Әмма сорауларның реаль масштабы шактый киңрәк, бу хакта цифрлы элемтә каналларыннан алынган мәгълүматлар сөйли: кире элемтә платформасы аша 52 меңнән артык хәбәр килгән, «Халык контроле» системасында 1600 хәбәр теркәлгән, «Инцидент Менеджмент» системасында 5700дән артык комментарий теркәлгән. «Халык контроле» дәүләт мәгълүмат системасына мөрәҗәгатьләр саны буенча «медицина ярдәме күрсәтү (табиб кабул итү)», «ашыгыч медицина ярдәме эше», «табибка язылу мөмкинлеге», «даруханәләрдә һәм даруханә пунктларында ташламалы дару препаратлары булмау» категорияләре лидерлык позициясен алды, - дип белдерде докладчы. 
Шулай ук гражданнарны яшәү өчен кирәкле дару препаратлары белән тәэмин итү мәсьәләләре буенча да мөрәҗәгатьләр килгән.