«Түбән Кама Нефтехим»дагы янгын: 9 кеше һаман да табылмаган

Алар арасында подряд оешмалары хезмәткәрләре дә бар.

Предприятие матбугат хезмәте хәбәр иткәнчә, хәзерге вакытта барлык көчләр югалган кешеләрне эзләүгә юнәлтелгән. Гадәттән тыш хәлләр министрлыгы һәм предприятие белгечләре бергәләп коткару эшләрен дәвам итә. Шулай ук югалган хезмәткәрләрнең гаиләләре белән даими рәвештә психологлар һәм кадрлар бүлеге хезмәткәрләре элемтәдә тора.

Искәртеп узабыз, кичә предприятие территориясендә газ кабыну нәтиҗәсендә янгын чыккан иде. Соңгы мәгълүматлар буенча, фаҗигадә 3 кеше, шул исәптән янгын сүндерүче, һәлак булган. Барлыгы 71 кеше зыян күргән, аларның 5есе авыр хәлдә.