VK Festта Татарстанның «кунак бүлмәсе» ачыла: кунакларны Сабантуй, танышулар һәм хәтта никах көтә

Ул кунакларны милли мәдәният, гаилә кыйммәтләре һәм заманча аралашу мохите белән таныштырачак.

Мәйданчыкта «Идел» милли сәхнәсе, халык һөнәрләре буенча мастер-класслар, тематик фотозоналар һәм Сабантуй уеннары тәкъдим ителәчәк. Кунаклар күн мозаикасы, келәм чигү, агач бизәкләре ясау, керамика һәм каллиграфия буенча осталык дәресләрендә катнаша алачак.

ТР Премьер-министры урынбасары Ләйлә Фазлыева сүзләренчә, быел фестивальдә Сабантуй атмосферасын тудыру максаты куелган.

– Бу көнне республика шәһәрләре һәм район үзәкләрендә Сабантуй бәйрәмнәре узачак. Шуңа күрә VK Fest мәйданчыгында да милли бәйрәм рухын яңартырга булдык. Сабантуй ул уеннар һәм ярышлар гына түгел, ә гаилә ял итүе, гореф-гадәтләр һәм танышу урыны да, – дип билгеләп үткән ул.

Сабантуй мәйданчыгында фестиваль кунаклары капчык киеп сикерү, мендәрләр белән көрәшү, көянтә белән йөгерү кебек милли уеннарда катнаша алачак.

Фестивальнең иң үзенчәлекле вакыйгаларының берсе – «Идел» сәхнәсендә узачак никах теркәү тантанасы. Зөлфәт һәм Елизавета исемле яшьләр үз мөнәсәбәтләрен рәсмиләштерәчәк. Алар «ВКонтакте» социаль челтәрендә танышкан һәм нәкъ менә VK Fest мәйданчыгында гаилә корырга булган.

Моннан тыш, фестивальдә ГТО мәйданчыгы да эшләячәк. Ул танышу һәм аралашу зонасы вазифасын үтәячәк. Биредә яшьләр бер-берсе белән таныша, аралаша һәм гаилә мөнәсәбәтләре буенча белгечләрдән киңәшләр ала алачак.

VK Fest билетларын фестивальнең рәсми сайтында алырга мөмкин.