Әлмәт 3 көнгә театр рухына күмеләчәк

Лаборатория кысаларында “Әлиф” иҗади берләшмәсе катнашучылары татар халыкның мифологик һәм әдәби байлыгына нигезләнеп яңа төр әсәрләр иҗат итәчәк. фестиваль “Татнефть” хәйрия фонды ярдәме белән уза. 

“Аркадаш” театраль проекты Аваздаш фестивале кысаларында уза.  Фестиваль иҗат лабораториясе, белем бирү лекцияләре һәм остаханәләрне берләштерә. “Әлиф” берләшмәсе иҗатчылары әлмәтлеләр һәм шәһәр кунакларына 4 спектакль тәкъдим итәчәк. Һәр спектакль нигезендә татар сәнгатендә тирән эз калдырган шәхесләр ята. Язучы Йолдыз Миңнуллина Хәсән Туфан һәм Клара Булатова тормышы, иҗатына нигезләнгән “Мин түгел” спектаклен әзерли.
- Сүз, сүздән авазга, яктылыкка күчү ярдәмендә бер-беребезне аңларга тырышачакбыз. Тамашага нигез итеп ике бөек шагыйрьнең мирас итеп калдырган иҗатын алдык. Шушы әсәрләр ярдәмендә без сүзнең мәгънәсенә төшенергә, аңлашырга тырышабыз, эзләнәбез, - диде Йолдыз Миңнуллина. 

Шулай ук проект кысаларында композитор Эльмир Низамов һәм режиссер Туфан Имаметдинов татар рәсем сәнгатенең атасы Бакый Урманче иҗатын хор ярдәмендә күрсәткән премьера әзерли.