“Һәр өченче” концерт-реквиемын Россиядә беренче итеп Татарстан Республикасында тәкъдим итәбез»

Белоруссиянең Оборона министрлыгы белән Мәдәният министрлыгы теләктәшлегендә оештырылган әлеге чара 1941-1945 елларда совет халкының Җиңүенә 81 ел тулуга багышлана. Реквием, ягъни хәтерләп искә алу мәгънәсендәге театраль концертта фронт һәм сугыш елларының фотодокументлары экранда яктыртылды. Залда Белоруссия партизаннарына багышланган күргәзмә тәкъдим ителде.

Белоруссия Республикасы Президенты администрациясе башлыгының беренче урынбасары Владимир Перцов Татарстанга “Герой Брест крепосте” мемориал комплексы реликвиясен һәм Белоруссия Республикасында Бөек Ватан сугышы темасына нәшер ителгән китаплар тапшырды. Брест крепосте кирпечен-реликвиясен Татарстан Республикасы Милли музееның генераль директоры Айрат Фәйзрахманов, ә китапларны Татарстан Республикасы Милли китапханәсе директоры Мәдинә Тимерҗанова кабул итеп алды. 
– Бөек Ватан сугышы елларында фашистлар Белоруссиядәге һәр дүртенче кешене үтергән дип санала иде. Тикшерүләр һәм эзләнүләр барышында һәм массакүләм каберлекләр табылу нәтиҗәсендә, инде Белоруссиядә һәр өченче кеше корбан булганлыгы ачыкланды. Фашистлар безнең кешеләрне җыйнап яндырганнар, шунлыктан корбаннар тагын да күбрәктер. Бөек Ватан сугышы турындагы тарихи дөреслекне без балаларга ирештерергә тиеш. “Һәр өченче” концерт-реквиемын Россиядә беренче итеп Татарстан Республикасында тәкъдим итәбез. Европа белән дуслыкта яшәргә өметләнгән идек, ләкин алар дуслыкка дуслык белән җавап кайтармадылар. Европа илләре безнең байлыкларны таларга, безнең бай территорияләрне басып алырга һаман да хыялланучылар булып чыкты, – диде Белоруссия Республикасы Президенты администрациясе башлыгының беренче урынбасары Владимир Перцов.

Татарстан Республикасы Премьер-министры урынбасары Ләйлә Фазлыева кадерле экспонатлар һәм концерт-реквием өчен Белоруссия вәкилләренә рәхмәт әйтте.
– Бөек Ватан сугышында совет халкы бердәм булып Җиңү яулады. Фронтта һәлак булганнарны, сугышчыларны, тыл хезмәтчәннәрен онытырга хакыбыз юк. Аларның батырлыклары нәтиҗәсендә илләребез азат, гимннарыбыз яңгырый, дәүләт флаглары күтәрелә. Сугыш еллары еракта калса да, өйрәнү-эзләнү дәвам итә. Хәтерне һәм дөреслекне сакларга тиешбез, – диде Ләйлә Фазлыева.

Белоруссия Республикасы оештырган “Һәр өченче” концерт-реквиемы Россиядә 2026 ел – Халыклар бердәмлеге елына, шулай ук Татарстанда 2026 ел – Хәрби батырлык һәм хезмәт фидакарьлеге елына аваздаш.