Ярым-ялангач сәхнә һәм мәгънәсез җырлар: татар эстрадасы кая бара

Безнең күренекле җырчыларыбыз Зифа Басыйрова, Илһам Шакиров, Әлфия Авзалова, Вафирә Гыйззәтуллина, моң чишмәсе Фәридә Кудашева, Флера Сөләйманова, Хәйдәр Бигичев һәм Зөһрә Сәхәбиева, Таһир Якупов, Хәмдүнә Тимергалиева, Хәния Фәрхи, Зилә Сөнгәтуллина, Гөлзада Сафиуллина, Резидә Шәрәфиева, Бәширә Насыйрова, Ания Туишева кебек җырчыларның җырларын тыңлау зур бәхет иде. 

Бүген моңлы җырчыбыз Бәширә Насыйрованың үз-үзен тотышы, киеп чыккан киемнәре, чишмә кебек саф чиста тавышы һәр җырчыга үрнәк булсын иде. Хәзерге җырчылар җырламыйлар да кебек, сәхнәдә сөйләп, сикереп кенә йөриләр. 

Хәзерге заман шагыйрьләребез дә мәгънәле җыр текстлары язмыйлар. Җырчылар да җыр текстларын да, көен дә үзләре язалар. Җырның көен композитор, ә җыр текстын шагыйрь язарга, ә концертны сүз остасы (конферансье) алып барырга тиештер инде ул. Гомәр Бәширов “Җидегән чишмә” җырының текстын язгач, композитор Сара Садыйковага мөрәҗәгать итә. Сара Садыйкова берничә көй яза. Ләкин Гомәр Бәширов канәгать булмый, ул башкачарак яңгырарга тиеш, ди. 
Күпмедер вакыт узгач, Сара Садыйкова Гомәр Бәшировка шалтырата. Мин көй яздым, килеп тыңла, әгәр дә монысы да ошамаса, мин белмим инде, ди. Менә шулай Зөһрә Сәхәбиева башкаруында, үлмәс «Җидегән чишмә» җыры барлыкка килә. 

Советлар чорында җырның сүзләренә бик нык игътибар итәләр иде. Махсус комиссия эшли иде. Минемчә, безгә шул вакытларга кире кайтырга вакыт җитте, юкса без татар моңын югалтачакбыз. 

Төрле инструментларга кушылып җырлау безгә хас түгел, татар халкы гомер-гомергә тальян гармунга кушылып җырлаган. Безгә Гөлшат Зәйнәшева, Наил Касыймов, Роберт Миңнуллин кебек шагыйрьләр, Сара Садыйкова, Ганс Сафиуллин, Риф Гатауллин кебек композиторлар бик кирәк. 

Марсель Фәрзетдинов

Билгеле булганча, Татарстанда «Кадрлар» илкүләм проекты гамәлгә ашырыла.