Юбилей шатлыгы һәм көтелмәгән кайгы: Татарстан симфоник оркестры 60 еллыгы алдыннан кадерле музыкантын югалтты

Юбилей концерты узачак

1 октябрь Сәйдәшев исемендәге концертлар залында Татарстан Республикасының Дәүләт академик симфония оркестрының 60 еллык юбилеена багышланган концерт узачак. Оркестрның сәнгать җитәкчесе һәм баш дирижеры Александр Сладковский “Татар-информ” мәгълүмат агентлыгында үткән матбугат конференциясендә бу концерт һәм оркестрның эшчәнлеге турында тулырак сөйләде. 

“Бик матур дата, оркестрыбыз да матур тарихлы. Безнең музыкантларыбыз да үзләренең эшчәнлеге белән махсус миссия башкарганын аңлый. Бу миссия кешеләргә музыка ярдәмендә бәхет өләшүдән гыйбарәт. Юбилей концертыбызда нигез салучыларны искә алачакбыз, шулай ук яшь музыкантларыбызны да тамашачыга тәкъдим итәчәкбез. Без республикабызның музыка тормышының яңа тарихын күрсәтәчәкбез”, - дип сөйләде дирижер.

Россиянең атказанган, Татарстанның халык артисты, опера җырчысы Альбина Шәһимуратова да бу концертка чакырылган. “Альбина Европа һәм дөнья күләмендә танылган мастерлар белән бергә эшләгән мастер. Без дуслар, һәм мин дуслыгыбыз белән горурланам. Ул – татар халкының горур кызы”, - диде Сладковский.

Маэстро 2010 елдан бирле оркестрның сәнгать җитәкчесе һәм дирижеры булып тора. Аның җитәкчелегендә оркестр яңа биеклекләргә иреште һәм Россиядә генә түгел, халыкара дәрәҗәдә дә танылган коллективларның берсенә әверелде. Аның сүзләренчә, эшчәнлегенең беренче елларында аңа ышанмаганнар, әмма ул бу эшкә юкка гына алынмаганын хезмәте белән дәлилли алган. 

Александр Сладковский коллективның үсеше һәм киләчәк планнар турында сөйләде

“Мин үземә максат итеп – Татарстан симфоник оркестрыннан мәдәни бренд ясауны куйдым. Рәисебез Рөстәм Нургали улы Миңнеханов та минем алдыма шундый максат куйды, һәм ул миңа юлымның башында ышанды. Иң мөһиме – күзләр янарга тиеш. Күзләрең янмаса, оркестрның да эшләргә дәрте булмаячак.

Без бер гаилә булып эшлибез һәм бер-беребезгә ышанабыз. Планнар күп, без хәзер композитор Густав Малерның студия язмаларын яздырабыз. Оркестрыбызның дәрәҗәсен һәм сыйфатын аңлыйсыздыр. Бу язмалар гомерлек булачак. Безнең иҗат итәргә мөмкинлекләребез бар, рәисебезгә рәхмәт”, - диде дирижер. 

26 сентябрь  көнне төнлә Татарстан Дәүләт академик симфония оркестрының контрабаслар төркеме концертмейстеры Марат Волков кинәт тромб өзелүеннән вафат булды. Бу аянычлы хәбәр турында да Сладковский телгә алды. “Матбугат конференциясе дә, Марат белән саубуллашу мәрасиме дә бер көнгә туры килде. Маратның өч баласы әтисез калды. Аңа бары тик 51 яшь иде. Оркестрыбыз белән аны соңгы юлга озаттык. Ул безнең оркестрыбызның нигезе иде. Һәр музыкантыбыз алтын кебек кадерле, үзләрен сакласыннар”, - дип сүзен йомгаклады Сладковский.