“Калфаклы сандугачлар” сәхнә гөрләтте

Традиция буенча бу юлы да Сара апаның иҗатына гашыйк яшь талантлар 4нче татар гимназиясендә Гала-концертта очрашты.

Мәгълүм булганча, Казан шәһәре Киров районы танылган шәхесләргә бик бай: Советлар Союзы геройлары, Россия геройлары, хезмәт алдынгылары, хезмәт ветераннары, күренекле шагыйрьләр, артистлар. Алар арасында мәшһүр композитор Сара Гариф кызы Садыйкова һәм аның кызы балет сәхнәсе хезмәт ветераны Әлфия Газиз кызы Айдарская да бар.

2004нче елдан 4нче татар гимназиясе инициативасы белән үткәрелә башлаган Сара Садыйкова исемендәге «Калфаклы сандугач» конкурс-фестивале быел 13нче тапкыр гөрләде. Бу юлы ул Россия Федерациясендә «Ватанны саклаучылар елы һәм 1941-1945 еллардагы Бөек Ватан сугышында Җиңүнең 80 еллыгы, Киров районының 100 еллык юбилее кысаларында, «Бөек композитор Сара Садыйкованын кызы Әлфия Айдарскаяга 100 яшь" девизы астында үтте. Конкурсның онлайн турында 100гә якын бала өч номинациядә (вокал-соло, вокаль ансамбль, камерлы-инструменталь чыгыш) көч сынашкан, мәртәбәле жюри алар арасыннан иң-иңнәрен сайлап алган. Алар Гала-концертта чыгыш ясау мөмкинлеген яулаган.

Фестивальнең Гала концертына мәртәбәле кунаклар: мәшһүр композиторыбыз Сара Садыйкованың кызы – Әлфия ханым Айдарская һәм Татарстанның халык артисты, педагог Мингол Галиев, татар эстрадасының танылган җырчылары Салават Миңнеханов һәм Алсу Фазлыева, Татарстан Мәгариф министрлыгы һәм Казан мәгариф идарәсе вәкилләре чакырылган иде. Һәркайсы бу чараның зур әһәмиятен ассызыклап, катнашучы яшь талантларга зур бәя бирде. Җылы сүзләр, алкышлар мулдан яңгырады.  

«Вокаль ансамбль» номинациясендә Казанның «Татар телендә тәрбия бирүче 24нче катнаш төрдәге балалар бакчасы»ның «Мәрҗән» ансамбле җиңү яулады. Нәни конкурсантларны диплом, статуэтка һәм «Шәһри Казан»га ярты еллык язылу белән бүләкләделәр.

- Бу конкурста безнең балалар беренче тапкыр катнашты. Чынлап кына әйткәндә, җиңәрбез дип көтмәгән идек. Кызларыбызның сәхнәдә җырлау тәҗрибәсе генә булсын дигән идек. Нәтиҗәдә, аларның башкаруындагы Мостафа Ногъман сүзләре, Сара Садыкова көенә «Туган авылыма» җыры жюри вәкилләренең күңелен яулап ала алган,  - дип концерттан соң хисләре белән уртаклашты бакча мөдире Айгөл Мәрданова.

Гран-прига исә Казанның 24нче музыка мәктәбенең «Музыкальная шкатулка» вокаль ансамбле ия булды. Афәрин!