1971 елда Лима Кустабаева Татар дәүләт җыр һәм бию ансамбленең баш хормейстеры була. 1978 елдан 2000 елга кадәр ул Татар дәүләт җыр һәм бию ансамбленең сәнгать җитәкчесе вазифасын башкара.
Кәрим Тинчурин исемендәге Татар дәүләт драма һәм комедия театрында ТР Дәүләт җыр һәм бию ансамбле чыгыш ясады, җылы вә эчкерсез теләкләр яңгырады. Чөнки биредә сәнгать сөючеләре бер урынга җыйган зур бәйрәм булып узды – Россиянең халык артисты, РСФСР һәм ТАССРның атказанган сәнгать эшлеклесе Лима Гали кызы Кустабаеваның 80 яшьлек юбилее!
Искәртеп узарга кирәк, әлеге концертның беренче бүлегендә ансамбль алтын фондтан Лима Кустабаеваның иҗат эшчәнлеге чорында иҗат ителгән күренекле әсәрләрен тәкъдим итте. Икенче бүлектә «Аулак өй» вокаль-хореографик композициясе күрсәтелде, аны исә үз вакытында Лима Кустабаева торгызган һәм сәхнәгә куйган.
“Әлеге концерт – Лима Галиевнага коллектив өчен эшләгән яхшылыкларына рәхмәт йөзеннән музыкаль-хореографик бүләгебез. 1985 елда ул мине балет артисты итеп эшкә алды. Укытучың өчен юбилей бәйрәме оештыру – зур җаваплылык! Лима Галиевнаның ансамбль формалашуга керткән өлешен бәяләп бетергесез. Ул мирасны саклап калган һәм баеткан шәхесебез. Без аның тарафыннан бирелгән үсеш векторын саклыйбыз”,– дип ассызыклый ансамбльнең сәнгать җитәкчесе, РФ атказанган, ТР халык артисты Айрат Хәмитов.
“Кичәбезнең героинясы шундый зур шәхес! Кеше гомерен еллар түгел, ә шул елларның мәгънәле булуы билгели. Лима Галиевнаның тормыш, иҗат юлына карасаң, аның еллары тулы булуы күренә. Илсур Рәисович та әле бүген генә Казанның Совет районындагы Сабан туйларын үткәрергә булышуыгызны яратып һәм сагынып искә алды, сәлам һәм котлау сүзләрен җиткерде”,– диде Казан шәһәре мэры урынбасары Гүзәл Сәгыйтова.
Исегезгә төшерәбез, Лима Гали кызы Кустабаева 1945 елның 3 августында Чиләбе өлкәсенең Магнитогорск шәһәрендә туа. Совет һәм Россия хор дирижеры, режиссер, сценарист, педагог, мәдәният эшлеклесе. РСФСРның атказанган сәнгать эшлеклесе (1987). Россия Федерациясенең халык артисты (1996).
1971 елда Лима Кустабаева Татар дәүләт җыр һәм бию ансамбленең баш хормейстеры була. 1978 елдан 2000 елга кадәр ул Татар дәүләт җыр һәм бию ансамбленең сәнгать җитәкчесе вазифасын башкара.
Лима Кустабаева элекке буыннарның мирасын саклап калучыларның берсе, ул Фәйзи Гаскәров һәм Гай Таһировның “Аулак өй” һәм “Казан кунаклары” кебек элек булдырылган программаларын яңарта һәм үстерә. “Сабантуй” программасы исә ансамбль тарихында яңа этапның башлануын билгеләүче беренче мөстәкыйль эше.
Фото: Елена Гредюшко
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар