Тинчурин театрында ремонт ясыйлар

Тиздән “Йөрәккә дә ремонт кирәк!..” комедиясен сәхнәгә чыгарачаклар. “Быелгы җәй безнең өчен эш белән узып бара”, –  ди Тинчурин театры директоры Фәнис Мөсәгыйтов. Тинчуриннар 24 июльдән эштә. “4, 5 сентябрь көннәрендә тамашачылар хозурына өр-яңа спектакль чыгарачакбыз. Спектакльдә көн кадагына суга торган вакыйгалар бәян ителә. Анда тормыштагы вакыйгалар турында барачак,” – ди театр җитәкчесе.  

Язучы, драматург, журналист, Татарстанның атказанган сәнгать эшлеклесе Айгөл Әхмәтгалиева әсәрен Уфа режиссеры, Башкортстанның атказанган сәнгать эшлеклесе Зиннур Сөләйманов сәхнәләштерә. Әлеге спектакль 92 нче театраль сезонның беренче премьерасы. 

Тинчуриннарга Зиннур Сөләйманов исеме яхшы таныш. Моннан җиде ел элек Казанга килеп, “Нәзер” спектаклен куйган булган. Шул ук состав һәм өстәмә артистларны да җәлеп итеп, тагын бер театраль тамаша эшләргә керешкәннәр. “Бернинди каршылыксыз, җай белән эш бара”, – ди театр директоры. Бу – Зиннур Сөләйманованың 50 спектакле икән. 

– Казанга, Тинчурин театрына, 50 нче спектакль белән килүем очраклы гына булды. Моңа кадәр Тинчурин театрының берничә артисты белән бер спектакль сәхнәләштергән идек. Шуннан соң Тинчурин театры труппасы белән тагын эшләп карыйсым килде. Хәзер, кабаттан бирегә әйләнеп кайтып, алар белән хезмәт куя алуыма икеләтә сөенеч. Мин Тинчурин театры актерларының профессиональ яктан үсешен күрәм, алар белән эшләве рәхәт. Көчле команда белән эшлибез, – ди режиссер Зөлфәт Сөләйманов. 

Режиссер әйтүенчә, спектакльдә уйланырлык та, көлерлек тә урыннар бихисап. “Төп максатыбыз тамашачыга якынрак булу. Тамаша кылып утырган кешеләр үзләрен, үзләренең дусларын да спектакль барышында “таный” алырлар. Спектакльнең төп үзенчәлеге, тормышчан булуда. Биредә мәхәббәт, ялгызлык, аны җиңеп чыгарлык көч, теләк-максатлар, һәр кешенең бәхеткә лаек булуы ачык чагыла”, – ди Зиннур Сөләйманов. 

Спектакльне сценограф һәм костюмнар буенча рәссам – Лилия Сөләйманова, композитор – Васил Гафаров, ут кую буенча рәссам – Илдар Шакиров сәхнәгә чыгара.

– Лилиянең үзенчәлеге шунда, ул технолог. Аның белән эшләргә бик уңайлы. Ул һәр нәрсәне аңлап, күзаллап эшли белә. Бик талантлы рәссам, – ди режиссер рәссам турында. 

Татарстанның халык артисткасы Зөлфия Вәлиева бу спектакльдә таза ханымны уйнаячак. “Безгә текстларны май аенда бирделәр. Үземә тиешле рольне күргәч, Зиннур Фәритович  ялгышкан, мине оныткан ахрысы, бу образ ничек миңа туры килсен инде, дип аптырадым. Хәтта үзенә шалтыратып та әйттем. Мин бу рольгә туры киләмме, дидем, – ди Зөлфия Вәлиева. –  Өч ел элек Нурания Җамали миңа башка роль биргән иде. Гадәттә, таза хатыннарны уйлаганда, таза булып күренү өчен эчкә нәрсәдер тутырабыз. Әлеге спектакльдә рәссам исә башка технологияләр куллана. Мин бу образда тулаем үзгәрәчәкмен. Үземне шулай күрү миңа кызык, ләкин беләм, сәхнәдә җиңел булмаячак, тирләп-пешеп йөриячәкмен.  Әйбәт режиссер белән эшләү артист өчен бик отышлы. Ул сине һәм образыңны  синнән күбрәк белсә артист өчен шулкадәр рәхәт, кулдан җитәкләп барган кебек. Артистлар сәхнәгә чыкканда карурманга килеп кергәндәй үзләрен хис итә. Читтән үзебезгә карый алмыйбыз. Ә режиссер сине күрә, ул сиңа юл күрсәтә. Зиннур Сөләйманов нәкъ тә менә шундый режиссер, аның белән образны ачу җайлы”.  

– Чыннан да, аның белән эшләргә бик рәхәт, – ди Татарстанның атказанган артисты Ирек Хафизов. – Артистларга нәрсә кирәген төгәл итеп аңлатып бирә. Артист белән режиссер бер дулкында булганда эшләргә бик уңайлы. Беренче проекттан соң Зиннур Сөләйманов белән кабаттан бергә эшлисе килеп калган иде. Җитәкчеләргә рәхмәт, безгә шундый мөмкинлекне тудырдылар. Мин спектакльдә сөюгә сусаган ялгыз ир-ат ролендә. Кай җирләренә ремонт кирәк, бөтенесен дә төзәтәм. 

Фото: https://tinchurinteatr.ru/