Төрмәдә җырлаган бар, трамвайда юк иде әле...

- Ел саен радио көнен үзенчәлекле, кызыклы итеп бәйрәм итәргә тырышабыз. Ачык һавада да концертлар ясадык, Казанның төрле почмакларында да чыгыш ясадык. Узган ел “Татнефть-арена” залында зур концерт үткәрдек. Быел тамашачылар белән күзгә-күз карашып, бергә җырлап йөрисе килде, - ди “Болгар радиосы”ның башкарма директоры Илфар Кәримов. 

Караоке-трамвай деподан Академик Арбузов тукталышына юнәлде.  Беренче тукталышта ук, трамвай утыргычлары үз хуҗаларын тапты. Чараны “Болгар радиосы” “Иртәнге чәй” тапшыруы алып баручылары Эльвира Вильдан һәм Илнар Йосыпов алып барды. 
- Радиотыңлаучылардан да ныграк сөенәбез. Без бит алардан килгән хатларны укып, күңел җылысын сизәбез генә. Ә бүген тыңлаучыларыбыз белән очрашабыз. Аларның йөзләрен, елмаюларын, шатлыклы йөзләрен күрәбез, - ди Эльвира Вильдан. 

Караоке-трамвайга татар эстрадасы йолдызлары да кушылды. Беренчеләрдән булып Рафил һәм Эльмира Җәләлиевләр чыгыш ясады.
- Иртән уянгач, хатирәләрне барлап алдым әле. Моннан 7-8 ел элек Салават абый белән гастрольләрдә йөргән чакларда төрмәгә кадәр барып җырладык, ләкин трамвайда җырлаган юк иде әле. Беренче тәҗрибә. Нәрсә кияргә, нәрсә җырларга белмәдек. Бераз дулкынландырды. Шулай да бик шәп, күңелле чара булды, - ди Рафил. 

Тышта 26 градус булса, трамвай салонында 32 градус иде. Радиотыңлаучылар белән бергә мунча кереп кайткан төсле булдык. Оештыручылар маршрутның шул кадәр популяр булуын күз алдына да китерә алмагандыр, мөгаен. Алып баручылар, артистлар белән бергә трамвайда әйләнү өчен Арча, Кукмара, Балтач һәм башка районнардан махсус килгән тамашачылар да булды.

Трамвайда алма төшәр урын да калмады. Җәмәгать транспортында бу гадәти хәл инде. Кешеләрнең этешү-төртешүләре, бер тәмләп бәхәсләшеп алуы да аерым бер традиция. Караоке-трамвайда кеше күп булса да, ызгыш-талаш булмады. Куандым әле. “Миңа киләсе тукталышта чыгасы, үтсәм мөмкинме?” - дип татарча сорадылар хәтта. Чыгарга теләгән кешене чыгардылар, “алгарак үтим әле”, - дисәң, үткәрделәр. Могҗиза! Бәлки, бәйрәм рухы күңелләрне тынычландыргандыр. Гадәти тормышта да шулай итәгатьле булып, үз телебездә сөйләшсәк иде. Булдырабыз икән бит.

Караоке-трамвайда булган тамашачылар фикере:
Фәридә Мортазина, Казан:  Караоке-трамвайда беренче тапкыр булдым. Бик күңелле, кызык. Оештыручыларга рәхмәт. “Болгар радиосы” алып баручыларын үз күзләребез белән күрдек. Безне гел шулай шатландырып торсыннар. Мин радио даими тыңлыйм. Һәр эшне радио белән бергә башкарабыз.

Фәния Зыятдинова, Түбән Вартовск: Бәйрәмгә очраклы гына эләктем. Бәхетле билет шушындый буладыр. Кунакка килгән идем, чара турында ишеткәч, барып карарга булдым. Без татарча тапшыруларны бик яратып тыңлыйбыз. Көнем “Болгар радиосы” белән башлана. Җәмәгать транспортында болай күңелле йөргән юк иде әле.

Гөлсинә Галимова, Балтач: Кызу булды инде. Әмма күңелле булгач, түздек. Эссегә түзәсең инде, сөякләр җылы ярата бит. Тагын оештырсалар, тагын киләр идем. Трамвай зуррак булса, яхшы инде. Тагын күбрәк кешене сыйдыра алыр идек.