VI “Шомбай-фест”: Татарстанда халыкара курчак театрлары фестивале узды

Биш көн эчендә 13 спектакль күрсәтелде. Аларны Санкт-Петербург, Мәскәү, Уфа, Казан шәһәрләреннән театр  тәнкыйтьчеләре бәяләде. 

Иң элек шуны әйтергә кирәк: театр җитәкчеләре әлеге фестивальне оештыруда күп көч куйганлыклары сизелеп тора. Сәнгать җитәкчесе Илгиз Зәйниев белән театрның башкарма директоры Илфат Ганиев спектакьләрне үзләре сайлап алсалар, бу юлы аларны тамашачы буларак карадылар.  

Фестивальдә катнашучы коллективларның һәрберсе спектакльләре белән генә түгел, үзенчәлекле курчаклары белән дә аерылып тора. Артистлар балалар белән бергә, өлкән тамашачыны да могҗизалы сәнгать дөньясына алып керәләр. Казахстанның Алматы шәһәре курчак театры аеруча җәлеп итте. Анда әкият белән музыка бергә үрелеп бара.

Думбра, кубыз, сыбызгы кебек борынгы уен коралларында уйнап, алар белән таныштырып баралар. Әлеге кызыклы алым беркемне дә битараф калдырмагандыр. Алар күрсәткән “Ортеке” спектакле жюри тарафыннан тиешенчә бәяләнде һәм фестивальдә “Иң яхшы спектакль” исеменә лаек булды. “Иң яхшы режиссер эше” номинациясен Башкорт дәүләт курчак театры (“Тьма египетская”) яулады. Кайбер спектакльләрдә сугыш темасы яктыртылган.

 Мали Республикасы күрсәткән “Маленький Сиу” спектакле балалар өчен тәрбияви яктан әһәмиятле. Авырлык килгәндә бер-береңә ярдәм итү – бүгенге көндә иң кирәкле сыйфатларның берсе. Алар жюриның махсус бүләгенә лаек , – дип табылды.

Театр тәнкыйтьчесе Нияз Игъламов әйтүенчә, быел фестивальгә бик көчле программа сайланган.

«Без Серб һәм Африка театрларын кайчан күрер идек әле. Катнашучы Россия театрларының яртысы “Алтын битлек” премиясе номинантлары. Театрлар төрле төбәкләрдәге мәдәниятне күрсәтәләр. Серб Республикасында бер караганда, славяннар яши. Без балалар белән үлем турында сөйләшмәскә тырышабыз. Әмма алар сүз белән түгел, форма, матур курчаклар аркылы үлемне күрсәтә. Сәнгать алымнары аша балалар белән бу темага сөйләшү бик мөһим. Фестивальне оештыручы театр буларак, биредә “Әкият” курчак театры катнашмады. Иманым камил: әгәр катнашсалар, “Материнское поле” спектакле (аларның конкурстан тыш күрсәтелде) фестивальнең югары бүләгенә лаек булыр иде», – дип сөйләде  Нияз Рәүф улы. 

Фестивальнең кунагы буларак катнашкан театрның элекке баш режиссеры Илдус Зиннуров үз фикерләре белән уртаклашты:

– Без башлап җибәргән (2013 ел) фестиваль уңышлы дәвам итә. Спектакльләр бер-берсенә охшамаган. Һәрбер спектакль нигезенә тирән мәгънә салынган. Аларда үзара дус яшәргә, туганнарыңа, дусларыңа тугры булырга, туган илеңне яратырга өйрәтә. Спектакльләрнең һәркайсы игътибарга лаек. Курчак театрын халыкка танытуда фестивальнең роле зур. Үзара аралашып яшәү, бер-берсенең сәнгатен баета, гореф-гадәтләре белән таныштыра.

Әйе, фестивальләр курчак театрларына тәҗрибә тупларга ярдәм итә. Ике арадагы дуслык күперен ныгытуда да аларның әһәмияте зур.

Люция Хәбибуллина.