Винера Ганиева: “Безнең бәйгенең төп үзенчәлеге – чикләүләр булмау”

Катнашучылар академ, эстрада вокалы, халыкчан башкару, остаз һәм укучы номинацияләрендә көч сынашачак. Бәйгедә үзешчән башкаручылар да, профессионаллар, коллективлар да катнаша ала. 

– Бу бәйгенең тарихы – консерватория студентының хыялыннан башланды. Консерваториядә укыганда конкурс, бәйгеләрдә күп катнаша идем. Менә шул вакытта: “Мин дә конкурс оештырырмын”, – дип максат куйдым. Дөрес, аңа кадәр тәҗрибә тупладым. Опера һәм балет театрында 44 ел хезмәт итәм, шуның 30 елын мәдәният институтында җырчылар әзерләүче кафедраны җитәклим. Шушы консерваториядә укыган Винераның хыялы чынга ашуына бик шат. Башта ул Россия күләмендә узды, хәзер инде дөньяның төрле тарафларында яшәүче татарларыбыз катнаша. Безнең бәйгенең төп үзенчәлеге – чикләүләр булмау. Яшь буенча да, репертуар буенча да чикләр куймыйбыз, – ди бәйгенең авторы, жюри рәисе, Татарстанның халык артисты Винера Ганиева. 

12 ел эчендә бәйгедә Россиянең 55 төбәгеннән 22 меңгә якын кеше катнашкан. Казан Дәүләт мәдәният институты ректоры Роза Әхмәдиева сүзләренчә, мондый бәйгеләр системалы эш күрсәткече. 

– Безнең республикада вокаль осталык буенча системалы эш алып барыла. Винера Ахатовна җитәкчелегендә бу бәйгедә сабыйлар да, яшүсмерләр һәм өлкәннәр дә теләп катнаша. Моннан тыш, бәйгенең лауреатлары безнең институтка укырга да киләләр. Һәр җырчы остаз, педагог була алмый. Винера Ахатовнада җитәкчегә хас сыйфатлар да көчле. Вокаль кафедра – тел, мәдәниятне саклаучы мәктәп, – дип белдерде Роза Әхмәдиева. 

Гаризаларны 27 февральгә кадәр кабул итәләр. Остаханәләр дә оештырылачак. 

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.