26 яшьлек Илья Тарасов — Татарстанның Ел укытучысы: «Юлны мин түгел, ул мине сайлады»

"Казан шәһәре ел укытучысы" исеменә лаек булу - җаваплы, "Татарстан ел укытучысы" исемен йөртү икеләтә җаваплы. Мин алга таба да бу югарылыкны сакларга тырышачакмын. Алда - Россиякүләм бәйгедә катнашу. Бу тагын да мавыктыргыч булачак, тагын да көчле хис-кичерешләр бүләк итәчәк дип уйлыйм, ди Татарстанда "Ел укытучысы исемен яулаган Илья Тарасов. 

Бөтенроссия бәйгесенең төбәк этабының җиңүчесе Казан шәһәренең 121нче лицеенда рус теле һәм әдәбияты укыта. Аңа 26 яшь. Һөнәри стажы - 5 ел. Нәселендә укытучылар бер дә булмаган. "Юлны -  мин түгел, юл мине сайлады", дип көлә ул. 

– Юлымның башында ук мин үз-үземә болай дидем: "Бернидән дә курыкма - шул очракта үз теләгеңә ирешәчәксең". Шулай килеп чыкты да, - ди Илья Тарасов. 

Татарстан Мәгариф һәм фән министры Илсур Һадиуллин конкурсантларның һәркайсын күзәтүен, һәрберсе өчен борчылуын әйтте: 
– Сез үзегезне җиңеп, әлеге дәрәҗәгә җиттегез. Конкурсның мәктәп этабы ноябрьдә старт алды, аннан муниципаль этап, аннан зона этаплары. Бөтенроссия конкурсының төбәк этабының йомгаклау этабына 62 кеше - 62 җиңүче килде, шуларның 41е - "Ел укытучысы" номинациясендә, 21е - "Педагогик дебют" номинациясендә катнашты. Конкурсантларның уртача яше - 37 яшь. Барлыгы 13 ир-ат - 20%, 49 хатын-кыз - 80% тәшкил итә, - дип саннар китерде Илсур Һадиуллин. 

Мәгариф системасында 11% ир-ат эшли, әмма 20%ы конкурска килгән. Димәк, хатын-кызлар ир-атларга ярдәм итә, дип, министр мөгаллим хатын-кызларга аерым рәхмәтен белдерде.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.