Акчалата бүләкләр, стажировка һәм эш урыннары. Кемнәргә?

Барлыгы “Профессионаллар” чемпионатының төбәк этабында быел 2 меңгә якын конкурсант катнашуы көтелә. Компетенцияләр саны да быел рекордлы – ярышлар 330 юнәлештә оештырылачак. Шуларның 15е - өр-яңалар. Алар арасында бортпровотниклар, сәнәгать альпинизмы, росгравдиячеләр, һава транспортында каркынычсызлык һәм башкалар бар.

Татарстанның профессиональ компетенцияләрне үстерү үзәге генераль директоры Эмиль Гобәйдуллин сүзләренчә, бу кадәр ярышларны уздыру өчен белем бирү оешмаларының күпчелеге җәлеп ителәчәк. Үз һөнәрендә иң яхшыларны республиканың 23 шәһәр һәм районында 92 мәйданда сайлап алачаклар. Белем бирү оешмаларыннан тыш, аерым компетенцияләр буенча көч сынашу алдынгы предприятиеләр һәм оешмалар территориясендә дә уздырылачак.

- Хәзер сайлап алулар уза. Чемпионатта катнашырга теләүчеләр шактый күп. Төбәк этабы кысаларында без аерым игътибарны эш бирүчеләр белән эшләүгә юнәлтәбез. Елдан-ел чемпионатта катнашучыларга алар тарафыннан күбрәк мөмкинлекләр бирелә. Узган елны гына алсак та, 300гә якын кешене эшкә чакырдылар, 1000гә якын стажировка  үтү тәкъдиме булды. Быел мондый тәкъдимнәр тагын да күбрәк булыр дип уйлыйбыз, - дип сөйләде Эмиль Гобәйдуллин.

Чемпионатта җиңүчеләр акчалата да бүләкләнәчәк. Әйтик, алтын медаль яулаучыларга республика –150, көмеш отучыларга – 125, бронза ияләренә 100 мең сум түли. Моннан тыш, федераль түләү дә каралган. Бу сумма беренче урынга – 300, икенче урынга – 200, өченче урынга – 100 мең сум.

“Профессионаллар” һөнәри чемпионаты 2023 елда башлангыч алды. Татарстан командасы ярышларда ел саен югары осталыгын күрсәтә. Узган ел нәтиҗәләре буенча Татарстан Республикасы исәбендә 180 медаль, шул исәптән 54 – алтын, 62 - көмеш, 64 – бронза.