Авыл мәктәбе шәһәрнекеннән киммени? Сөмбел Хисамиева – 200 балл иясе

Медицина, билгеле! Шушы предметның икесен дә иң югары 100 баллга тапшырган Сөмбел Хисамиевадан да шунда ук “Табиб булырга хыялланасыздыр?” - дип сорадым.  Ялгышмадым. Кыз, чыннан да,  инде күптән үз киләчәген хәл итеп куйган. Үзен башка һөнәр иясе буларак күз алдына да китерә алмавын әйтә ул.

Авыл җирендә юньле укыту юк, сыйфатлы белем алу кыенрак, дигән була кайберәүләр. Сөмбел моның алай түгел икәнен үз мисалында инкарь итә. Ул Әтнә районы Күшәр авылы кызы. Башта үзләрендәге 9 еллык мәктәпне тәмамлап, 10-11не Күңгәргә йөреп укыган.

- Авылыбыз зур, 9 еллык мәктәп эшли. Ике ел элек аннан 9 бала чыгарылдык, шуларның өчесе – мин һәм ике егет 10-11гә барырга карар кылды. Күңгәрдә 11әү укыдык.  Авыл мәктәбе генә булса да, укыту көчле, укытучының да һәр балага игътибары җитә. Сыйныфташларым арасында БДИда югары балл алучылар шулай ук бар, - ди Сөмбел.

Сөмбелнең әнисе кафеда пешекче булып эшли, әтисе “Арск-Пласт”та хезмәт куя. Авылча гади тормыш алып баралар – сыерлары, тавыклары бар, җәен бакчада кайнашалар. Гомумән, сала җирендә эшең беткәне юк. Әмма имтиханнарга әзерлек чорында әти-әнисе Сөмбелне көнкүреш эшләрдән мөмкин кадәр азат итәргә тырышкан. БДИга ул ныклап торып узган елның августыннан әзерләнә башлый. 9нчы сыйныфта биология һәм химиядан ОГЭ тапшыруы ярап куя, бераз әзерлеге була. Шулай да соңгы уку елында көн дә белемнәрен камилләштерүгә, мәктәптән тыш, 5 сәгать вакыт киткән. Имтиханнар якынлаша башлагач исә 8-9 сәгатьләп шөгыльләнгән.

Мин химиягә дә, биологиягә дә укытучым Хәмдия Җәүдәтовна Галиева белән әзерләндем. Рус теле, биология һәм химия буенча онлайн мәктәптә курслар да белемнәремне ныгытырга ярдәм итте. Ни генә дисәң дә, мәктәп дәресләре кысаларында гына әзерләнү җитми, чөнки мәктәп программасыннан югарырак булган биремнәр дә булырга мөмкин, - ди Сөмбел.

Тырышлыгы юкка китмәгән – Сөмбел химия һәм биологиядән 100әр балл, рус теленнән – 91 балл алган, математиканы - "5"кә тапшырган. Кыз Казан дәүләт медицина университетына укырга керергә ниятләп тора, гаиләдән аерылып, еракка китәсе килми, ди ул. Алай да үз көчен сынап, документларын Мәскәү һәм Санкт-Петербург вузларына да юллап карарга уйлый.