#Мәгариф 12 сентябрь 2025, 20:07

Казанның 80нче мәктәбендә ярминкә узды

12 сентябрь 2025, 20:07

Җырлы-моңлы ярминкә 12 сентябрь көнне Каюм Насыйри исемендәге 80нче урта гомуми белем бирү мәктәбендә Бөек Җиңүнең 80 еллыгына һәм Каюм Насыйринең тууына 200 ел тулу уңаеннан ярминкә булып узды.

Скопировать ссылку

Белем йортының директоры Роберт Мансуров сәламләү сүзе белән чараны башлап җибәрде.

— Мәктәбебез турыдан-туры Бөек Җиңүгә өлешен керткән, беренче чыгарылыш укучыларыбыз, укытучыларыбыз шушы сугышта катнашкан. 1941 елдан алып 1945 елның ноябренә кадәр хәрби госпиталь базасы буларак кулланылган. Шулай ук бүгенге чара танылган мәгърифәтче, педагог, галим Каюм Насыйринең 200 еллыгы белән бәйләнгән. Ел дәвамында конференцияләр, түгәрәк өстәлләр, ачык дәресләр барды. Ярминкәнең тагын бер сәбәбе - якынлашып килүче укытучылар көне. Вакыйганың максаты да укучыларыбызның, әти-әниләрнең, укытучыларның үзләре эшләгән, пешергән төрле әйберләрне, иҗат җимешләрен, товарларны сатуда берләшүе. Бу аралашуга, күмәкләшүгә юл ача.

Роберт Мияссәрович белән шул арада без дә әңгәмә корып алдык.
— Сез алдарак кына әлеге чараның максаты турында телгә алдыгыз, ул ирешелдеме?
— Бик канәгатьмен. Иң мөһиме, бөтен сыйныфларның катнашуы. Монысы зур нәтиҗәләрнең берсе. Мәйданда аерым талантлы балаларны һәм бик актив әти-әниләрне күрәбез.

— Элегрәк бу чараны Иске Татар Бистәсендә үткәрә идегез, бәлки шул рәвешле күбрәк халык, туристлар игътибары җәлеп ителгәндер?
— Мәктәп бик уңайлы, матур урында урнашкан. Алдагы еллар белән чагыштырганда да, быел да килүче кунаклар шактый булды.

— Сатыла торган продукциягә бәяләрне кем куйды?
— Бу ирекле мәсьәлә, һәрбер сыйныф үзе куя. Артык кыйммәт бәя куелмый. Ярминкәдән җыелган акчаларны хәйрия фондларына җибәрәбез.
Шуны да әйтеп китик, май аенда мәктәп укучылары, укытучыларыбыз, әти-әниләр, ветераннар ярдәмендә мемориал ачтык. Ул сугыш вакытында госпиталь-мәктәптә эшләгән кешеләр һәм яу кырында булган көрәшчеләр исемнәрен саклый. Бу эшне башкарып чыгуга шактый көч куйдык, чөнки истәлек тактасы әти-әни, коллектив бюджетына гамәлгә ашырылды.

Уку йортының әти-әниләр комитеты рәисе Илнар Камил улы белән дә аралашып алдык.

— Әти-әниләр комитеты рәисе вазифасын икенче ел башкарам, - диде ул безгә. - Үз алдыбызга чиреккә бер тапкыр ярминкә оештыру максатын куйдык. Көз көнне ул "Мәрхәмәтлелек атнасы" акциясенә һәм Җиңүнең 80-еллыгына багышланган. Һәр сыйныф та тырышкан, оештыруны югары дәрәҗәдә дип бәяләр идем. Катнашкан һәркемгә рәхмәт.
Җыр-моңга, күтәренке кәефкә бай көн беркемне дә читтә калдырмады. Өстәлләрдә күңелең ни тели: баллы эчемлек, кайнатмалар, тәмнүшкәләр дисеңме – барысы да мулдан булды.