Казан университеты Идел буе халыклары мирасы мәсьәләләрен өйрәнү мәйданчыгына әверелде

Казан федераль университетының Филология һәм мәдәниятара багланышлар институты базасында «Идел буе республикаларының милли әдәбиятлары» дигән халыкара фәнни-гамәли конференция уздырылды. Чараның быел өченче тапкыр үтүе һәм халыкара дәрәҗәгә ия булуы аның әһәмиятен тагын да арттыра.
Филология һәм мәдәниятара багланышлар институты директоры Рәдиф Җамалетдинов үзенең сәламләү сүзендә катнашучыларга фәнни эзләнүләрендә уңышлар теләде: «Барыгызга да файдалы күзәтүләр телим, киләчәктә дә бергәләп хезмәттәшлекне дәвам итәрбез дигән өметтә калам», – диде ул.

Конференциянең төп максаты – Идел буе халыкларының мәдәниятара аралашу чараларының әдәби-сәнгать формаларын үстерү һәм камилләштерү, этноконфиссиональ мөнәсәбәтләрне ныгыту. Галимҗан Ибраһимов исемендәге Тел, әдәбият һәм сәнгать институты директоры Илгиз Халиков ассызыклаганча, «Бу көннәрдә Казан университеты Идел буе халыкларының бай мирасын саклау һәм үстерүнең актуаль мәсьәләләрен тикшерү өчен әйдәп баручы галимнәрне, әдәбият белгечләрен, психологларны, культурологларны берләштерүче профессиональ диалог мәйданчыгына әверелде».

Чараның мөһим бурычларының берсе – Идел буе әдәбият белеме мәктәпләре арасындагы хезмәттәшлекне үстерү, шулай ук галимнәрнең, яшь белгечләрнең, аспирантларның һәм студентларның Идел буе халыкларының милли әдәбиятларындагы мәдәниятара коммуникация проблемаларын өйрәнүгә игътибарларын юнәлтү. Мәгариф һәм фән министрлыгының Милли мәгариф идарәсе башлыгы Алсу Шәрипова бу уңайдан болай дип билгеләп үтте: «Бүгенге чара ул – мәдәният үсешенә зур өлеш кертү, киң диалог кору һәм тәҗрибә уртаклашу өчен мөмкинлек бирүче мәйданчык».

Конференция эшендә Россиянең алдынгы фәнни оешмалары һәм югары уку йортларыннан чакырылган галимнәр, яшь белгечләр актив катнашты. Быелгы чарага Башкортстан, Мәскәү, Мордовия, Удмуртия, Чувашия, Марий Эл республикаларыннан кунаклар килде. Ә Кыргызстан, Казахстан, Төркия кебек илләрдән катнашучылар конференциягә онлайн форматта кушылып, секцияләрдә үз фикерләрен җиткерәчәкләр. 

Конференциядә катнашучылар мондый чараларның милли әдәбиятны үстерүдә, аларны дөньяга танытуда һәм халыклар арасында дуслыкны ныгытуда зур әһәмияткә ия булуын ассызыкладылар. Конференция барышында ясалган докладлар һәм дискуссияләр киләчәктә фәнни хезмәттәшлекне киңәйтер һәм яшь буынның үз халкының бай рухи мирасына булган кызыксынуын арттырыр дигән өмет тудыра.

Залинә Гыйлаҗиева