Мәгариф киләчәге Татарстанда хәл ителә

Бу чара Казанда инде өченче тапкыр уза, аңа кызыксыну да артканнан-арта бара. Быел, әйтик, форумда 50гә якын ил вәкиле, 20ләп мәгариф министры катнаша. Дустанә чит илләрнең белем бирү системасын өйрәнү һәм үз тәҗрибәбез белән уртаклашуның яхшы мөмкинлеге бу. Форум катнашучылары мәгариф өлкәсендәге глобаль тенденцияләр, цифрлы инновацияләр, нейрочелтәрләрнең һәм онлайн-укыту мөмкинлекләре һәм халыкара хезмәттәшлек турында фикер алыша.

Форум ачылышында катнашучыларны видеотрансляция режимында Россия Президенты В.Путин сәламләде.

- Форумның «Киләчәкне формалаштырып» дип аталуы булачак дискуссиянең эчтәлеген тулысынча чагылдыра. Сезнең игътибар үзәгендә – мәктәпләрне, көллиятләрне, университетларны үстерү буенча практик адымнар. Яшь буынның тормыштагы, һөнәрендәге уңышлары, димәк, халыкларыбызның иминлеге һәм чәчәк атуы, бөтен кешелек цивилизациясе алга китеш ешуңа бәйле. Сез тәкъдим иткән яңа алымнарның көндәлек тормышта кулланылуы, мәгариф сәясәте өлкәсендәге карарларга нигез, дәүләт һәм бизнесны үстерүгә этәргеч булуы мөһим, - дип ассызыклады ил башлыгы.

Татарстан Рәисе Рөстәм Миңнеханов республикабызның  алдынгы технологияләр, куәтле сәнәгать базасы, халыкара партнерлыкка ачык төбәк булуын билгеләп узды.

- Монда, мәдәниятләр һәм традицияләр кисешкән урында, без мирасыбызны саклап кына калмыйбыз, ә мәгарифтәге инновацияләр аша киләчәккә юл салабыз. Зур тизлек белән барган үзгәрешләр шартларында мәгариф һәм фән илләрнең тотрыклы үсешендә төп факторга әверелә, - диде ул. 

Татарстан Рәисе искәртеп узганча, төбәгебез мәгариф һәм фән өлкәсендә лидерларның берсе булып кала. Биредә 6 меңнән артык мәктәпкәчә, гомуми, өстәмә һәм һөнәри белем бирү оешмасы, 45 югары уку йорты, 120 фәнни оешма исәпләнә. Уртак белем бирү программалары һәм фәнни-тикшеренү эшчәнлеге өлкәсендә чит илләр белән актив рәвештә халыкара хезмәттәшлек алып барыла. Иң яхшы белем бирү үзәкләрендә стажировкалар узу мөмкинлеге биргән «Алгарыш» программасы шушы хезмәттәшлекнең уңай мисалы итеп китерелде.

- Безнең максат – үз-үзеңне тормышта табу өчен шартлар тудыру. Бүген ярдәм алган һәр талант иртәгә бөтен ил өчен алгарыш этәргече булырга мөмкин, - дип билгеләде Рөстәм Миңнеханов.

Россия Мәгърифәт министры Сергей Кравцов белем бирү тармагын бәяләүнең яңа халыкара системасын булдырырга тәкъдим итте. Аның сүзләренчә, Россия бу эшне координацияли алыр иде.

- Бу бәяләү системасы сәясәттән азат булырга, ил мәнфәгатьләрен исәпкә алырга, белем бирү, инфраструктура, укытучыларны әзерлек дәрәҗәсен чагылдырырга тиеш. Бу бәя илләргә үсеш алырга, үзенең көчле һәм “йомшак” якларын күрергә ярдәм итәчәк, - дип белдерде Кравцов.