Татарстанда БДИ нәтиҗәләре арткан: 416 укучы иң югары балл күрсәткән

Республикада сигез предмет буенча уртача балл күтәрелгән

Чаллыда үткән Мәгариф хезмәткәрләренең август киңәшмәсендә Татарстан Мәгариф һәм фән министры Илсур Һадиуллин республикада белем бирү сыйфаты һәм Бердәм дәүләт имтиханы нәтиҗәләренә тукталды.

Татарстанда 416 укучы БДИда иң югары нәтиҗә күрсәткән

416 укучы БДИда иң югары нәтиҗә күрсәткән, шуларның: 364 е — 100 балл, 50 унберенче сыйныф укучысы — 200 балл алган.

КФУның IT-лицееннан Ләйсән Шакирова һәм Казан Суворов хәрби училищесыннан Роман Сахарных берьюлы өч предмет буенча максималь балл алган. Математика буенча 8 укытучы 5тән артык йөз балл алучы укучы әзерләгән. Ә Казанның 131 нче лицее укытучысы Кирилл Сергеевның 15 укучысы иң югары балл туплаган.

Россия Президенты инициативасы белән быел 3 меңнән артык укучы бер имтиханны кабат тапшыру мөмкинлегеннән файдаланган. Аларның 70%ы үз нәтиҗәсен яхшырткан, 13%ы саклаган, 17%ы начаррак баллар алган.

Татарстанда табигый-фәнни предметларны сайлау күрсәткече 40 процентка җиткән

Министр билгеләп үткәнчә, Россия Хөкүмәте имтиханда табигый-фәнни юнәлештәге предметларны сайлау күрсәткечен 38%ка җиткерү бурычын куйган иде. Республика аны артыгы белән үтәгән, 40 процент укучы бу предметлардан сыналган. Лениногорск, Баулы һәм Чирмешән районнарында бу дәрәҗә 44%тан артып киткән Шулай ук Казан, Чаллы шәһәрләрендә һәм Түбән Кама районында да әлеге предметларны имтихан буларак сайлау динамикасы уңай дип бәяләнә.  

Сигез районда табигый-фәнни фәннәрне сайлау күрсәткече түбән

Шуның белән бергә, 8 районда күрсәткеч билгеләнгән нормадан түбән кала. Илсур Һадиуллин район җитәкчеләренә мөрәҗәгать итте.

- 8 районда бу табигый-фәнни юнәлештәге предметлардан имтихан тапшыручылар исәбе 38 проценттан түбән кала. Район башлыклары һәм мәгариф бүлекләре җитәкчеләреннән билгеләнгән күрсәткечләрнең төшүенә юл куймауларын сорыйм, - диде министр.