Татарстанда мәгариф инфраструктурасын яңарту дәвам итә: 2030 елга укучылар саны кимүе көтелә

Татарстанда 2010 елдан бирле 115 мәктәп һәм 303 балалар бакчасы төзелгән

Традиция буенча бу чара яңа уку елына башлангыч буларак үткәрелә. Мәгариф вәкилләре яңа уку елына планнары, өмет-ышанычлары белән уртаклаша. Киңәшмәдә Татарстан Рәисе Рөстәм Миңнеханов та катнаша. 

• Татарстан мәгариф һәм фән министры Илсур Һадиуллин билгеләп үткәнчә, икътисади хәлнең катлаулылыгына карамастан, мәгариф тармагындагы инфраструктураны яңарту дәвам итә. 2010 елдан бирле 115 мәктәп һәм 303 балалар бакчасы төзелгән. Мәктәпкәчә яшьтәге балалар өчен 820 урынлы тагын 3 яңа бина, шулай ук 4 мең укучыга исәпләнгән 5 мәктәп һәм 2 өстәмә корпус төзелеше тәмамланып килә. Капиталь ремонт та үткәрелә: 14 ел эчендә — 1160 гомуми белем бирү оешмасы (агымдагы елда — 55), 581 балалар бакчасы (18-ендә эшләр дәвам итә) яңартылган. 

2030 елга Татарстанда укучылар саны 6 процентка кимүе көтелә

Ашау зоналарын модернизацияләүгә аерым игътибар бирелә: 5 ел эчендә 674 ашханә төзекләндерелгән, сентябрьгә кадәр тагын 67 ашханә блогы яңартылачак. 

— Шулай да инфраструктура бөтен җирдә дә рациональ кулланылмый. Күпчелек шәһәр мәктәпләре артыгы белән тулы, ә кече торак пунктларда укучылар белән тәэмин ителеш проект куәтеннән чирек дәрәҗәсендә генә. Кайбер 300 урынга исәпләнгән оешмаларда 15тән дә азрак бала укый, — дип борчуларын уртаклашты министр. 

2030 елга укучылар саны 6 процентка кимү фаразлана. Шуңа күрә, Илсур Һадиуллин сүзләренчә, хәзер муниципалитетлар белән берлектә мәгариф объектларын файдалану стратегиясе эшләнә.