Татарстанда мәгариф өлкәсенең яңа уку елына өстенлекләре билгеләнде

Мәгариф вәкилләре яңа уку елына планнары, өмет-ышанычлары белән уртаклашты, фикерләште. Киңәшмәдә Татарстан Рәисе Рөстәм Миңнеханов та катнашты.   

2010 елдан Татарстанда 115 мәктәп һәм 303 балалар бакчасы төзелгән

Рәис киңәшмәне йомгаклап, төп тезисларны билгеләп китте. Иң башта ул, Татарстан мәгариф һәм фән министры китергән саннарга тукталды:

— 2010 елдан бирле генә дә бездә 115 мәктәп, 303 балалар бакчасы төзелде — бу гаять зур ресурслар. Капиталь ремонтка без зур финанслар юнәлтәбез. Хәзер менә урта һөнәри учреждениеләрнең тулай торакларына капиталь ремонт ясауга керешәбез, — дип билгеләп үтте ул.

Туган телләрне өйрәнү дәвам итәчәк

Туган телләрне өйрәнү мәсьәләсе дә һәрдаим Татарстан Рәисе игътибары үзәгендә. Ул Татарстан Мәгариф һәм фән министрлыгы белән бергә Марат Готыф улы Әхмәтов җитәкләгән комиссиянең бу юнәлештә бик яхшы эшләвен әйтеп үтте.

— Гомумән, барлык телләр: аңлашыла ки, рус теле турында әйтеп тә тору кирәкми, чуваш теле дә, мордва теле дә, мари теле дә, һәм, әлбәттә, татар телен дә өйрәтүдә без зур эш башкарылуын, яхшы нәтиҗәләргә ирешелүен күрәбез. Безнең бурыч — бу эшне алга таба да шулай ук нәтиҗәле дәвам итү, — дип ассызыклады Рөстәм Миңнеханов.

Һөнәри белем бирүдә эш бирүчеләрнең роле арта

Бүген бик актуаль тема — ясалма фәһемгә дә тукталды ул. Аның сүзләренчә, заманча технологияләр педагогларның эшен нык җиңеләйтә, бертөрле кызыксыз эшләрдән азат итә.

Һөнәри белемгә дә игътибар сүрелми. КАМАЗ, Сибур, Татнефть, Алабуга үрнәге менә бу мәсьәләләрне бик актив алга этәрүен билгеләп үтте Рәис.

- Безнең эш бирүчеләр кадрлар әзерләмичә, аларга беркем дә берни бирмәячәген аңладылар. Моннан чыгып, профильле кафедралар да, техник базаны ныгыту да, ресурс үзәкләр булдыру алып барыла. Бу теманы контрольдә тотачакбыз, - дип вәгъдә бирде Рөстәм Миңнеханов.

Мәгариф учреждениеләрендә куркынычсызлыкка игътибарны арттырырга кирәк

Куркынычсызлык мәсьәләсе дә август киңәшмәсендә үзәккә куелды. Күптән түгел генә БПЛА һәҗүме нәтиҗәсендә һәлак булган 13 кеше турында телгә алып, ниндидер яшеренү чаралары үтәлгән булса, бу югалтулар булмас иде, дип билгеләп үтте Рәис.

• Мәгариф учреждениеләрендә куркынычсызлык чараларына бигрәк тә салкын карарга ярамый, дип кисәтте ул.