Химиядән 100 балл алган Азалия Габдуллина: «Табиб булырга хыялланам»

Гел “бишле”гә генә укыган кызның сынатмавы алдан ук билгеле була. Кыз – уку алдынгысы, химия буенча республика олимпиадасы призеры.

- Мин башлангычта 32нче гимназиядә белем алдым, аннары 35нче лицейга күчтем. 1нче сыйныфтан гел бишлегә генә укыдым, фәнни эшләр белән күп кенә конференцияләрдә чыгышлар ясадым, олимпиадаларда катнаштым, химия буенча олимпиадаларга әзерлек җыеннарына бардым, - дип сөйләде үз уңышлары турында Азалия.

9нчы сыйныфны ул кызыл аттестат белән тәмамлый һәм лицейда табигый-фәнни профильле сыйныфта укуын дәвам итә. Хәзер дә “алтын” медаль белән чыгарылырга исәбе.  100 баллга ирешүдә аңа үҗәтлеге, иң югары балл алу теләге һәм, әлбәттә, әти-әнисенең ярдәме булышуын әйтә ул.

Имтиханнарга әзерләнүгә Азалия 11нче сыйныф башыннан керешә. Әмма уку алдынгысының моңа кадәрге база белемнәре инде яхшы дәрәҗәдә була. Олимпиадаларга әзерләнеп чарланган кыз бит! Өстәвенә, химия аның яраткан предметы да әле. Шуңа күрә репетиторлар да яллап тормыйлар. Азалия  ютубта вебинарлар карый, лицейдагы химия укытучысы да еш кына катлаулы “пробниклар” үткәргән. “Шуның белән без хәтта стандарт булмаган биремнәрне чишүгә дә әзер идек”, дип укытучысы Вера Губарева өлешен билгели Азалия. Сүз уңаеннан, быел бу мөгаллимнең тагын бер укучысы 100 балл иясе.

Химиядән имтихан язганнан соң кыз нәтиҗәләре турында уйламый. Алда бит әле аны рус теле һәм биология имтиханнары көткән була  - шуларга ныклап әзерләнүен дәвам итә. Иң югары балл алуын биология буенча имтиханнан чыккач белә. Моңа бик тә сөенә, билгеле. Чөнки бу аның хыялына ирешүнең беренче адымы – ул медицина университетына укырга керергә җыена.

- Табиб һөнәрен сайлавымның сәбәбе гади. Минем әйләнә-тирәдәгеләргә файда китерәсем, бу дөньяны яхшырак һәм сәламәтрәк итәсем килә! Укырга төгәл кайсы вузга керәчәгемне имтиханнарның барлык нәтиҗәләре билгеле булгач сайлаячакмын, - ди Азалия.