«Әлфия Авзалова кирәк чагында 14 телдә җырлап бирә алган, андый шәхесләр сирәк бит ул»

Якыннары, җырчыны яратып тыңлаган тамашачылар белән бергә, мәрхүмәне соңгы юлга озатырга республика җитәкчелеге дә килгән иде. Матәм митингында Татарстанның Дәүләт Киңәшчесе Минтимер Шәймиев, Дәүләт Советы рәисе Фәрит Мөхәммәтшин, Президент Аппараты җитәкчесе Әсгать Сәфәров, мәдәният министры Айрат Сибагатуллин һәм башкалар катнашты.

- Бүген бөек җырчыбыз Әлфия Авзалованы соңгы юлга озатабыз. Язмыштан узмыш юк. Рәхмәт, бүген күпме халык килде. Аңа мәхәббәт күренеп тора, артык сүз кирәк тә түгел. Ул безнең халкыбызның газиз баласы. Ятим бала һәрвакыт газиз бала. Халык аны үз кочагына алды, - диде Минтимер Шәймиев.

Ул Әлфия Авзалованың тавышына Александр Ключарев һәм башка шәхесләрнең дә сокланганын билгеләп узды. Минтимер Шәймиев җыр­чы тормышында филармониянең зур роль уйнаганын, табигатьтән бирелгән сәләтен ачуда ярдәме хакында әйтеп узды.

- Җыр сәнгатендә иң тирән эз калдырган шәхесләрнең берсе. Кешенең үзеннән тора: Әлфиянең җорлыгы, тырышлыгы, тормышта югалып калмавы шушы казанышлары барлыкка килүгә нык ярдәм итте. Булганның булганы булып чыкты ул. Илһам һәм Әлфия үз чорының бизәге, безнең мирасыбыз булды. Бөтен илне гизеп, күпме җырлар җырлап, халкыбызның моңын башкаларга җиткерү - моннан да зур эшләр кайда булыр? Әлфиянең таланты зур, ничәмә-ничә миллион кешеләргә хезмәт иткән кеше начар кеше була алмый. Бу - зур казаныш. Әлфиянең гомере - җырлап узган гомер. Моң патшабикәсе дию аңа зур бәһа дияр идем. Әлфия кирәк чагында 14 телдә җырлап бирә алган. Шушындый сәләтле кызыбызны соңгы юлга озатабыз. Андый шәхесләр сирәк бит ул. Татар моңы, башка телләрдә җыр­ланганда да, үзенчәлеген югалтмый, - дип билгеләп үтте Минтимер Шәймиев.

Дәүләт Киңәшчесе бүген кайбер артистларның өлкән җырчы­ларыбызга игътибарлы булуын белдерде.

- Салават Әлфияне сәхнәгә җи­тәкләп йөрде. Мин моны үрнәк итеп әйтәсем килә. Шулай булырга тиеш. Безгә үзебезнең кадерне белергә кирәк. Бу безнең халкыбызга хас әйбер. Әлфиягә дә, балаларына да, аларның иптәшләренә дә рәхмәт. Син халкыбызның күңелендә бар һәм булачаксың, - дип төгәлләде Беренче Президент.

Актаныш муниципаль районы башлыгы Фаил Камаев исә районның үзәк мәдәният йортына Әлфия Авзалова исеме биреләчәген әйтте.
- Әлфия апаның җырлары мәктәпләрдә утырган һәр баланың, кырларда иген иккән абыйларның, Донбасс шахталарында күмер чапкан, сугыштан аяк-кулларын югалтып кайткан каһарманнарның күңелләрен елатты да, юатты да. Ул милләтне җырлатты да, милләтне елатты да. Ул - ватаныбызның сайрар сандугачы, - дип белдерде чыгышында Татарстан Язучылар берлеге рәисе Данил Салихов.

Әлфия Авзалова турында фикерләрен шулай ук Татарстанның халык артисты Зөһрә Шәрифуллина, Татарстанның халык артисты Әзһәр Шакиров, Татар дәүләт филармония­се директоры Кадыйм Нуруллин да җиткерде.

ФОТОРЕПОРТАЖ