«Сандугач»лар кыш дип тормый

Коллективта барысы 15 хатын-кыз. Зөһрә ханым үзе башта мәгариф өлкәсендә хезмәт куйган. Соңгы 15 ел дәвамында әлеге ансамбльне җитәкли.

- Безнең барыбызның яшен бергә кушсак, 1043 яшькә җыела, ә уртача яшебез 73ләр тирәсе. Репертуарыбызда 80гә якын җыр бар. Бигрәк тә халык һәм эстрада җырларын, бәетләр, мөнәҗәтләрне яратып башкарабыз. «Төйдергечләр» дигән фольклор уены да күрсәтәбез, - ди җитәкче.

Ансамбль шактый гына фес­тивальләрдә катнашып, лауреат булган. Тирә-юньдә үткәрелә торган чараларның берсе дә алар катнашыннан башка узмый. Былтыр «Сандугач» ансамбленең 25 еллыгын да үткәргәннәр. Надежда Мальцева - 20 ел буе ансамбльнең алыштыргысыз баянчысы. Милләте буенча рус кешесе булса да, татар җырларын җырлый. Коллективта һәркайсының тавышы үзенчәлекле. Нурзия Калиева белеме буенча медицина хезмәткәре. Ул ансамбльгә 15 ел йөри. Ата-бабаларыннан мирас булып калган борынгы җырларны өйрәнү теләге тартып китергән аны бирегә.

Кунаклар Бөтендөнья татар конгрессында да булдылар.

- Без сезнең ансамбльне ишетеп тә, күреп тә беләбез. Сез телебезне, мәдәниятебезне саклауда зур өлеш кертәсез. Сездәге көчле энергетика күренеп тора, - диде Бөтендөнья татар конгрессы рәисе урынбасары Данис Шакиров.

«Ак калфак» оешмасы җи­тәкчесе Кадрия Идрисова коллективка, халыкка рухи азык өләшкәннәре өчен, рәхмәтләрен җиткерде.

- Сезнең тавышыгыз га­җәеп, чын сандугачларныкы сыман, исемегезгә туры килә. Киемнәрегез дә милли, зәвыклы итеп тегелгән. Безгә элекке киемнәрне кире кайтарыр­га кирәк, - дигән теләкләрен дә ирештерде Кадрия ханым.

Кунаклар үзләренең репертуарларындагы кайбер җырларын да башкардылар.

Кунаклар кичә Арча райо­нында Тукай эзләре буйлап сәяхәт иттеләр һәм концерт куйдылар. Бүген Казанның истәлекле урыннарында булачаклар.