«Эвакуация вакытында иптәшләре аны иң беренче урамга алып чыкканнарын белгәч, күземә яшь тыгылды»

Шушы гаилә һәм мәктәп арасындагы бәйләнешне ныгыту өчен, Татарстан Мәгариф һәм фән министрлыгы «Тату сыйныф серләре» дигән бәйге башлап җибәргән иде. Мәктәп-гимназия сыйныфларындагы әти-әниләр комитеты өчен махсус оештырылган ул. Республика буенча бу ярышта 1380 сыйныф катнашкан, аларның 460ы - район күләменә, ә 50 команда республиканың финал ярышларына чыккан. Әлеге ярышта Казан шәһәренең татар телендә белем бирүче 155нче гимназиясенең 5Б сыйныфының әти-әниләр комитеты да бар. Алар «хезмәт тәрбиясе» дигән номинациядә мактаулы 2нче урынга лаек булганнар. Әлеге гимназиянең тәрбия эшләре буенча директор урынбасары Әлфирә Борһанова, 5Бның сыйныф җитәкчесе Фәнүзә Усманова, сыйныфның әти-әниләр комитеты рәисе Алсу Адагамова һәм иң актив әниләрнең берсе Розалия Бариева белән очрашып, әлеге җиңүнең нигезен тәшкил иткән алшартлар хакында сораштык.

- Сыйныфыбызда малайлар күбрәк, аларның саны - 17, кызларыбыз 11 генә. Гадәттә, мондый сыйныф белән эшләве бик ансат булмый. Ә бездә киресенчә. Чөнки балалар, бәхеткә, барысы да тулы, тату гаиләләрдә үсәләр. «Оясында ни күрсә, очканында шул булыр», диләр бит. Ә безнекеләрнең оялары нык, таза. Әти-әниләре балаларын тәрбияләү һәм белемле итү өчен бөтен тырышлыкларын куялар. Балалар бик җаваплы, бер-берсенә ярдәмчел. Сыйныфыбызда мөмкинлекләре чикләнгән бер малай бар. Мәктәптә эвакуация өйрәнүләре вакытында иптәшләре аны иң беренче булып урамга җитәкләп чыгарганнарын белгәч, күзләремә яшь тыгылды, - ди сыйныф җитәкчесе.

- Бәйге турында күрсәтмә килгәч, гимназиянең шактый сыйныфлары катнашып карарга булды. Ләкин 5Бларга җиткәне булмады. Яшерен-батырын түгел, хәзер кайбер мәктәпләрдә балаларга хезмәт тәрбиясе бөтенләй бирелми диярлек. Бездә алай түгел. Киресенчә, кечкенәдән үк бала үз хезмәтенең җимешен татысын, шуңа сөенергә өйрәнсен дип тырышабыз. Гимназиябездә елына дүрт-биш тапкыр хәйрия ярминкәләре уздырыла. Ә аңарчы балалар төрле түгәрәкләрдә үз куллары белән матурлык булдыра: чәчәкләр ясый, картиналар яза. Аларны сатудан кергән акчаны ярдәмгә мохтаҗ яшьтәшләренә илтеп бирәләр. Бер атуда ике куянны тотабыз. Эшкә дә, игелекле булырга да өйрәтәбез,- ди директор урынбасары. - Конкурска шушы эшләребез хакында яздык.

Ә бит әти-әниләргә мәртәбәле жюри каршында чыгыш ясарга да туры килгән. Ярый әле Алсу Әбелханова, Губскийлар гаиләсе шикелле артистлары да бар. Бөтенесе бер булып тырышканнар. Иң мөһиме, бу эш болай да дус-тату булулары белән гимназиядә аерылып торган сыйныф укучыларын һәм аларның әти-әниләрен тагын да дуслаштырган.

^{_{Фото: yalkyn.com}}