Җиңү сере – күп йөрүдә, күп күрүдә

- Минем әлеге ярышта беренче тапкыр гына катнашуым һәм җиңүем түгел инде, - диде Гөлия, өлкәннәрчә җитди итеп. - Узган ел беренче сыйныфка кергәндә бирделәр аны безгә. Матур китап шикелле төсле рәсемле яңа көндәлекне мин бик яраттым, махсус сайтына да теркәлдем. Ул бит сине өйдә генә утыртмый, төрле җирләргә сәяхәт иттерә. Ә мин күп йөрергә, күп күрергә, күп белергә яратам. Башта районыбыздагы мәдәни урыннарда булдым: китапханә, музей, театрга бардым. Булган һәрбер җирне фотога төшереп, аны сайтка куеп бардык. Әниемнең сеңлесе бик нык ярдәм итте. Беренче сыйныфны тәмамлаганда шунысы беленде: әлеге көндәлекне бер мин генә төгәл итеп тутырганмын икән. Юкка тырышмаганбыз - җиңүчеләрне Казанга чакырдылар. Анда башкала буенча сәяхәт иттек, Милли китапханә янында балалар язучылары белән очраштык. Аннары Зөя утравына алып бардылар. Икенче көнне «Әкият» курчак театрында спектакль карадык. Бүләкләү тантанасы да шунда узды.

Беренче сыйныфта ук зур җиңү белән канатланган кыз икенче сыйныфта да көндәлеген бик тырышып тутыра. Әнисе һәм апасы белән Арчага музейга, Казанга театрларга барганын да теркәп куя. Кызның тырышлыгы бу юлы да гадел бәяләнә. Районның икенче сыйныф укучылары арасында Гөлия Кәлимуллина тагын җиңүче булып табыла. Быел да май азагында җиңүчеләрне башкалага алып барып бүләклиләр.

- Мондый кызыклы конкурсларны оештыручыларга бик зур рәхмәт, мин үземә яңа дуслар таптым, - ди Гөлия.

Хәзер кыз мәктәп яны лагеренда ял итә. Казанда бүләккә бирелгән футболкасын һәм бейсболкасын һәр көнне киеп килә ул.

Конкурста балалар белән бергә әти-әниләр дә катнаша ала. «Иң культуралы әти-әни» номинациясендә быел 53 өлкән кеше җиңү яулады. «Мондый конкурслар гаиләләрне берләштерергә ярдәм итә», - диләр алар бертавыштан.