#Мәгариф 03 февраль 2015, 05:42

Казан кадет мәктәбендә кул сугышы буенча көч сынаштылар

03 февраль 2015, 05:42

Казан кадет мәктәбендә ел саен кул сугышы буенча турнир үткәрү күркәм гадәткә әйләнгән. Аның быелгысы Бөек Ватан сугышы ветераны Павел Кликневка багышланды. Шушы көннәрдә 90 яшен тутырган ветеран үзе дә әлеге чарада катнашты. Турнирга Казан Суворов исемендәге хәрби училищесы, Кама Тамагы районы, Васильево бистәсе кадет мәктәпләре командалары җыелды.

Скопировать ссылку

Казан кадет мәктәбендә кул сугышы буенча көч сынаштылар

Әлеге мәктәптә патриотик тәрбиягә аеруча әһәмият бирелә. Кадетлар үзләренең алган белемнәрен, физик әзерлекләрен төрле ярышларда күрсәтәләр. Кадет мәктәбе узган ел Россиядә иң яхшы 100 мәктәп исемлегенә дә кергән.

- Без укучыларыбызның язмышы белән алар укуларын тәмамлап киткәч тә кызыксынып торабыз. Алар Казанда гына түгел, Россиянең күп кенә хәрби һәм юридик уку йортларында белем алалар. Мәктәбебездә ике музей эшли. Аның берсе 146 нчы укчы дивизия сугышчыларына, икенчесе десантчыларга багышланган, - диде мәктәп директоры, подполковник Валерий Басов.

Турнирда җиңүчеләргә тапшырылган кубоклар, медальләрне дә мәктәп администрациясе үзе алган. Беренче урынны Казан кадет мәктәбе белән Суворов хәрби училищесы курсантлары яулады. Шул ук кадет мәктәбеннән Сергей Яруллин «Иң яхшы техника өчен» номинациясендә, ә Роман Камалов «Ирек өчен җиңүгә» дигән төрдә җиңүчеләр булды. Бу җиңүдә аларның тренерлары Тәлгат Камалиевның да өлеше зур.

Советлар Союзы герое Борис Кузнецов курсантларга киләчәктә кыю, батыр йөрәкле булып үсүләрен теләде.

Кызыклы яңалыкларны күзәтеп бару өчен безнең МАХ каналына кушылыгыз.

#250