«Мәктәп һәм балалар бакчалары тирәли койма кору ул бизәк өчен генә түгел»

– Хәзер 244 учреждениедә эшләр тәмамланды, калганнарында бурычны ноябрь ахырына башкарып чыгу планлаштырыла, – дип хәбәр итте “эшлекле дүшәмбе” киңәшмәсендә Социаль өлкә учреждениеләрен карау һәм хезмәт күрсәтү департаменты директоры Петр Королев.

Башкалада 533 мәгариф учреждениесе исәпләнә: 169 мәктәп, 312 балалар бакчасы, 52 өстәмә белем бирү учреждениесе. Алар барлыгы 654 бинага урнашкан. Петр Королев сүзләренә караганда, мәгариф учреждениеләренең 40 процентында коймалар тиешле дәрәҗәдә түгел, ә кайсыларында коймалар бөтенләй юк.
 Бу хәлгә шәһәр Башкарма комитеты җитәкчесе Рөстәм Гафаров нык канәгатьсезлек белдерде.

 – Мәктәп һәм балалар бакчалары тирәли койма кору ул бизәк өчен генә түгел, ә норматив таләп. Без аларны үтәргә тиешбез. Моннан ары “коймасыз өйгә кайту ансатрак” яки “гомер буе шулай йөрдек, тагын да йөрербез” дигән сүзләр кабул ителми. Инде маршрутны үзгәртергә туры килер. Сүз берничә чакрым турында түгел, ә берничә дистә адым турында бара, аны узарга кирәк булыр. Мәктәп яки балалар бакчасы территориясендә чит кешеләр булырга тиеш түгел, бу – табу, – диде Рөстәм Гафаров.

Җитәкче коймаларны вату очраклары күзәтелгәндә, аларны тиз арада төзәтү зарурлыгын искәртте, мәгариф учреждениеләрендә иминлекне саклау чараларын ноябрь ахырына тәмамларга кушты.