Рөстәм Миңнеханов: “Дистанцион уку җайлы һәм нәтиҗәле булырга тиеш”

Татарстан Президенты Рөстәм Миңнеханов видеоэлемтә режимында республикадагы белем бирү учреждениеләрендә дистанцион укытуны оештыру мәсьәләләре турында фикер алышты. Бу турыда Президентның матбугат хезмәте хәбәр итә.

Рөстәм Миңнеханов онлайн рәвештә мәктәпләрдәге дәресләрне күзәтте, укучылар һәм укытучылар белән аралашты. Бүген республикада дистанцион формада укуга 96 урта профессиональ белем бирүоешмасы, 41 югары уку йорты һәм 1402 мәктәп күчте. Күбесе уку процессын оештыруда авырлыклар белән очрашты. Алар техник характердагы проблемалар иде.  

Интернетның сыйфатына Лениногорск нефть техникумы педагогы игътибар итте. Аңардан күп куллану аркасында онлайн-платформада элемтә кайвакыт бозыла. Миңнеханов аңа, проблемалы мәсьәләләрне профильле белгечләр хәл итә, якын арада дистанцион эш җайга салыначак, дип белдерде. «Безнең өчен дистанцион уку системасының җайлы һәм нәтиҗәле булуы бик мөһим. Билгеле бер кыенлыклар бар, без аларны җайга салачакбыз.Онлайн уку системасының ничек эшләвен белү кирәк иде миңа. Шуңа да сезнең белән сөйләшергә булдым. Хәзергә барысы да шома түгел, әмма киләчәктә алынган тәҗрибә уку процессында катнашучыларның барысына да зур өстенлекләр һәм яңа мөмкинлекләр бирәчәк. Без уза торган бу юл Татарстанда онлайн-белем бирүнең тулы кыйммәтле һәм сыйфатлы системасын формалаштыру өчен нигез сала», – диде Президент.

Чаллының 78 нче лицее укучылары яңа форматка ничек җайлашулары турында сөйләде. Бөтен дәресләрне бер платформада үткәрү мөмкинлеген карауны да сорадылар. Хәзер укытучылар  edu.tatar, zoom һәм башка порталларда «Учи.ру», «Российская электронная школа», «Виртуальные факультативы» кебек берничә вариантны куллана. Рөстәм Миңнеханов аларга, профильле министрлыклар бу мәсьәлә белән шөгыльләнә, дип җавап бирде.

Укучылар бу төр укуның кайчанга кадәр сузылачагын да сорашты. Президент әйтүенчә, бүген республикада тотрыклы вазгыять саклана, әмма бу чикләүләр кертү нәтиҗәсендә генә. Ул барысына да сабыр булырга һәм саклык чараларын күрергә кушты. Хәзер иң мөһиме – сезнең сәламәтлегегез, диде ул.