Депутатлар сайлау көне билгеле: Татарстанда меңнәрчә участок эшләячәк

Россия Президенты Владимир Путинның 2026 елның 16 июнендәге Указы нигезендә, IX нче чакырылыш Дәүләт Думасына депутатлар сайлау билгеләнде. Сайлау 18-19-20 сентябрьләрдә үткәрелә. Россиянең яңа төбәкләре – Донецк Халык Республикасы, Луганск Халык Республикасы, Запорожье һәм Херсон өлкәләрендә яшәүчеләр дә Дәүләт Думасына депутатлар сайлауда тавыш бирә быел.

Татарстан Үзәк сайлау комиссиясе 1 июльдә Казан Кремлендә Россия Дәүләт Думасына депутатлар сайлау кампаниясен оештыру буенча уку форумы башлады. Россия Үзәк сайлау комиссиясе рәисе Элла Памфилова форумда катнашучыларга видеоэлемтә аша мөрәҗәгать итте. “Татарстанның Үзәк сайлау комиссиясе сайлауларга кагылышлы чараларны яхшы оештыра”, – дип әйтеп үтте Элла Памфилова.

– Халыкара сәясәт катлаулы булган хәлләрдә дә сайлауларны иминлектә үткәрү зарур. Тавыш бирүдә дистанцион, электрон алымнар да кулланылачак. Сайлау участогына килеп, бюллетень белән тавыш бирү әһәмиятле. Сайлаулар безнең җаваплылыкны һәм бердәмлекне күрсәтсен, – диде Россия Үзәк сайлау комиссиясе әгъзасы Людмила Маркина. 

Форумда катнашучыларга Россия Үзәк сайлау комиссиясе әгъзасы Елена Осипова да аңлатмалар бирде. Татарстан Үзәк сайлау комиссиясе рәисе Андрей Кондратьев әйткәнчә, республикада Россия Дәүләт Думасына депутатлар сайлауда 65 территориаль (шул исәптән 6 округ) һәм 2743 участок сайлау комиссиясе эшләячәк. Татарстанда 2 бюллетень бирелә: беренчесендә сәяси партия, ә икенчесендә бермандатлы округтагы кандидат күрсәтелгән.

Дәүләт Думасы – Россия Федераль Җыенының түбәнге палатасы. Аның составына 450 депутат керә, алар 5 елга сайлана.