Казанда киләсе атнада яз сулышы күзәтеләчәк: ”Студентлар язы”

– Бөтенроссия студентлар фестиваленең финалы Казанда инде дүртенче мәртәбә уздырыла. Быелгы чара Җиңүнең 80 еллыгына һәм 2025 ел – Ватан сакчылары елына багышлана. Татарстан җитәкчелеге яшьләр сәясәтенә нык игътибар бирә, студент-яшьләргә үзләрен күрсәтү мөмкинлекләре тудырыла. Республикада 250 меңнән артык студент белем ала. Татарстанның дәрәҗәле чаралар оештыру тәҗрибәсе зур, мәдәният биналары яхшы, шунлыктан Казанның сайлап алынуы гаҗәп түгел. Казан – студентлар шәһәре, ә студентлар булган җирдә һәрвакыт яз. Хәзер әле көз, ә ни өчен студентлар язы? Сәбәбе гади – фестивальнең сайлап алу өлеше март-апрель айларында ук барды, инде дә Казанда йомгак ясала. Фестивальдә Казанның 5 югары уку йортыннан 60 студент чыгыш ясаячак, – диде Татарстанның яшьләр эшләре буенча министры Азат Кадыров Хөкүмәт йортында үткәрелгән брифингта.

Фестивальне 25 ноябрьдә  ачу һәм 28 ноябрьдә ябу “Баскет-холл” спорт сараенда була. Студентларның конкурс чыгышлары “Тимерюлчылар”, Химиклар мәдәният сарайларында, “Созвездие-Йолдызлык” арт-резиденциясендә, “Урам” экстрим-паркында, Казан дәүләт мәдәният институтында, Идел буе дәүләт физкультура, спорт һәм туристлык университетында оештырыла.

– Россиянең 82 төбәгеннән 2 мең 100 студент катнаша фестивальдә. Донецк, Луганск, Запорожье республикаларыннан да киләләр. Җиңүнең 80 еллыгы шигарендә фронт җырлары һәм театраль күренешләре чыгышлары була. Милли телләрдәге чыгышлар да хуплана, – диде “Студвесна” яшьләр иҗатына теләктәшлек программасы җитәкчесе Валерия Позикова.

“Җиңүчеләргә бүләкләр буламы соң?”– дип, “Шәһри Казан” газетасы исеменнән сорау бирдем.

– Иҗат кешесенә тамашачыларның алкышы – иң олы бүләк. Әлбәттә инде, 300 җиңүче билгеләнә. Аларга иганәчеләрнең бүләкләре тапшырыла, акчалата премияләр дә каралган. Фестивальдә җиңү яулаган студентларны әле соңыннан төбәкләр җитәкчеләре үзләре дә бүләкли, – дип җавап бирде Валерия Позикова.

“Татарстан Республикасының яшьләр үзәге” дәүләт бюджет учреждениесе директоры Валентин Шихобалов таныштырганча, Россия төбәкләреннән фестивальгә килгән студентлар һәм делегацияләр өчен Казанның тарихи урыннарына, музейларга экскурсияләр планлаштырылган.

– Тамашачылар фестиваль башланырга 3 көн калганда “Студвесна” сайтында теркәлү уза алачак, – диде Валентин Шихобалов.

Бөтенроссия фестивалендә студентларның чыгышларын “ВКонтакте”да карап булачак.