Рөстәм Миңнеханов: «Яшьләр дипломатиясе академиясе» дөнья яшь лидерларын Казанга җыя

Очрашу ТР Хөкүмәте Йортында «Россия – Ислам дөньясы: КазанФорум» мәйданчыгы кысаларында узды.

Быел яшь дипломатлар форумы инде 10 нчы тапкыр үткәрелә. Аның төп үзенчәлеге — рәсми булмаган “горизонталь дипломатия” форматы. Форум Россия һәм ИХО илләре яшь дипломатларына актуаль мәсьәләләрне ачыктан-ачык фикер алышу мөмкинлеге бирә.

Форумда катнашучыларга видеомөрәҗәгать белән Россия Тышкы эшләр министры Сергей Лавров мөрәҗәгать итте. Ул Татарстан җитәкчелегенә һәм шәхсән Рөстәм Миңнехановка яшьләр дипломатиясен үстерүгә керткән өлеше өчен рәхмәт белдерде.

Рөстәм Миңнеханов ассызыклаганча, соңгы елларда Казанда Яшь дипломатларның глобаль форумы, БРИКС яшь дипломатлары очрашулары үткәрелде, ә быел Россия – АСЕАН саммиты уздыру планлаштырыла.

— Яшьләр дипломатиясе һәм халыкара хезмәттәшлекне үстерү — Татарстанның өстенлекле юнәлешләренең берсе. «Яшьләр дипломатиясе академиясе» проекты бөтен дөньядан яшь лидерлар өчен җәлеп итү ноктасына әверелә, — дип белдерде Татарстан Рәисе.

Очрашуда шулай ук Африка илләре белән хезмәттәшлекне киңәйтү, Гыйрак белән дипломатик багланышларны ныгыту һәм экология проектлары турында фикер алыштылар. Аерым алганда, кар барсы (ирбис) популяциясен саклау буенча халыкара инициативалар күтәрелде.

Форумда быел 20 илдән вәкилләр катнаша. 10 ел эчендә әлеге мәйданчыкта 40тан артык илдән 300дән күбрәк яшь дипломат булган.