Сатып алуларның 70 проценты Татарстан эчендә башкарыла

– Сатып алуларда Россия җитештерүчеләренә һәм чит ил товарларына алмаш продукция җитештерүчеләргә өстенлек бирелә. Әгәр теге яки бу продукция үзебездә дә бар икән, андый продукцияне чит илдән сатып алу тыела. Татарстан җитештерүчеләренә теләктәшлек күрсәтелә. Сатып алуларның 70 проценттан артыгы республика эчендә башкарылды. Татарстан үзе дә төзелеш, төзекләндерү, көнкүреш өчен кирәкле товарларны җитештерә. Үзебезнең предприятиеләрдән товар сатып алу – республика икътисадын үстерү, эш урыннары, дигән сүз. Сатып алулар үтәкүренмәле һәм төгәл булырга тиеш, – диде Татарстан Республикасының сатып алулар буенча дәүләт комитеты рәисе Марат Зыятдинов “Татар-информ” мәгълүмат агентлыгында үткәрелгән матбугат конференциясендә.

Төзелеш тармагында 191,1 миллиард сумлык, дарулар һәм медицина җиһазлары кайтартуда 10,97 миллиард сумлык һәм азык эшкәртү җиһазлары булдыруда 6,73 миллиард сумлык сатып алулар теркәлгән.

– Дәүләт сатып алуларын башкаруда катнашучы кешеләрнең белемнәрен күтәрәбез. Быел да 1800 кеше курслар узды. 2026 елда республика районнарында максатчан эшләргә планлаштырдык. Берничә ел элек районнардагы хезмәткәрләрнең дәүләт сатып алуларын оештыруда белемнәре һәм тәҗрибәләре бик үк мактанырлык түгел иде. Бу өлкәдә хәл елдан-ел яхшыра бара, – диде “Татарстан Республикасының сатып алуларны үстерү үзәге” акционерлык җәмгыяте генераль директоры Нияз Газиев.