45 миллионга якын чакыру: Ашыгыч ярдәмгә кайсы очракта мөрәҗәгать итәргә кирәк?

Ул 2020 елда COVID-19 пандемиясе чорында, ашыгыч ярдәм хезмәткәрләренә төшкән зур йөкләнеш сәбәпле рәсми рәвештә кертелә.
Моңа кадәр әлеге көн рәсми булмаган бәйрәм буларак кына билгеләп үтелә иде.1898 елның 28 апрелендә махсус указ чыгарыла, һәм Мәскәү шәһәрендә беренче ашыгыч медицина ярдәме станцияләре оеша, шулай ук авыруларны йөртү өчен беренче кареталар барлыкка килә.

Ашыгыч медицина ярдәме хезмәте даими үсеш кичерә. Бүгенге көндә ул – көчле һәм бердәм система: якынча өч мең станция, ашыгыч ярдәм хастаханәләре, санитар авиация һәм фәнни-тикшеренү институтлары эшли. Ел саен уртача 45 миллионга якын чакыру кабул ителә, ягъни Россия халкының һәр өченчесе диярлек елга бер тапкыр әлеге хезмәткә мөрәҗәгать итә.

Ашыгыч ярдәмне кайчан чакыртырга кирәк?

- Өйдә, урамда яки җәмәгать урыннарында кинәт барлыкка килгән кискен авырулар очрагында.
- Масштаблы һәлакәтләр һәм табигать бәла-казалары очрагында.
- Имгәнүләр, җәрәхәтләр, пешүләр, электр тогы сугу, суга бату, өшү, агулану очракларында.
- Тормыш өчен куркыныч тудыручы хәлләрдә: йөрәк-кан тамырлары, үзәк нерв системасы, сулыш органнары эшчәнлеге бозылганда, көчле кан киткәндә, көзән җыерганда.
- Бала табу вакытында яки йөклелек барышында катлауланулар булганда.
- 1 яшькә кадәрге балаларга – теләсә кайсы очракта.
- Психик тайпылышлар кискенләшеп, кеше үзенә яки башкаларга куркыныч тудырганда.

«103» номерына шалтыратканда нәрсә әйтергә кирәк?

Шалтыратучы диспетчер сорауларына төгәл һәм аңлаешлы җавап бирергә тиеш:
- чакыруның сәбәбен
- пациентның исем-фамилиясен
- адресны (шәһәр, урам, йорт, фатир, подъезд коды)
- телефон номерын
- мөмкин булган ориентирларны

Әгәр пациентның исем-фамилиясе билгеле түгел икән, аның җенесен һәм якынча яшен хәбәр итәргә кирәк.

Фельдшер: «Сезнең чакыру кабул ителде», — дип хәбәр иткәннән, чакыру вакыты белән адресны кабатлаганнан соң, чакыру кабул ителгән дип санала